Innarluutillit aporfissaqartarput
Innarluuteqartuulluni ilinnialernissaq suliffittaarnissarluunniit ajornaatsuinnaasanngilaq. Pisussinnaanngitsuugaanni ilinniarfissanut suliffeqarfinnullu iserniarneq ajornakusoortaqaaq. Nunatsinni innarluutillit atugaat pitsaanerulertinniarlugit, ukiormanna innarluutillit sapaatip-akunneranni 41-mi Ilinniartitaaneq suliassaqartinneqarnerlu qulequtaavoq. Ilaqutariinnermut Pisortaqarfimmi immikkoortumi pisortaq Naja Rosing Fleischer neriuppoq oqallilluartoqarumaartoq:
- Neriuutigaarput sulisitsisut aamma ilinniarfiit eqqarsaatissinneqalaassasut, namminneq qanoq iliorunik aamma innarluutillit periarfissinnerusinnaanerlugit. Imaannginnamimi innarluuteqaraanni tassa ilinniarsinnaatitaanermut mattunneqassasoq. Pinngitsoorneqarsinnaavoq aaqqiilaarnikkut, soorlu ilinniarfiit suliffeqarfiillu ilaasa illutai innarluutilinnut naleqquttanngillat, Naja Rosing Fleischer oqarpoq.
Aamma oqarpoq innarluutiliunngitsut ulluinnarni eqqarsaatiginngitsoortaripput innarluutilittatta aporfigisinnaasaannik eqqumaffiginninnerulernissaaq. - Eqqumanissaq pisariaqarpoq. Innarluutillit ulluinnarisaat innarluuteqanngitsuninngaanniit pisariuneruvoq. Pisariusorujussuuvoq ilaatigut pilerigisaminnut killilersorneqarpallaarlutik, naak immaqa arlaatigut annikitsutigut aaqqiinikkut iluatsinniarneqarsinnaasaraluartut, Naja Rosing Fleischer oqarpoq.
Sinerissami tamangajammi aaqqissuussisoqarpoq, ilaatigut Ilaqutariinnermut Pisortaqarfimmit aningaasaliiffigineqartunik.
