Innarluutilinnut marloriaammik sullissineq unitsinneqassaaq

Annertuumik innarluuteqalersimasut atortussaannik kommunimut qinnuteqartassapput, taava kommuni pissarsitinnani, Namminersorlutik Oqartussanut arlaleriarluni attaveqaqqaassaaq. Tamannalu pisariaqanngitsumik piffisartornartoq, Isumaginninnermut naalakkersuisoq Maliina Abelsen isumaqarpoq.

- Tassa sulisorpassuit suliassaq ataaseq marloriarlugu suliarisarpaat, Maliina Abelsen oqarpoq.

Tassalu taama marloriaammik sulisarneq qaangerniarlugu, aningaasaliissuteqartarneq aningaasaqarnikkullu akisussaaneq, Naalakkersuisut kommuninut tunniunniarpaat. Akisussaaffimmik nuutsineq kommuninik iluarsaaqqinnerup ilagaa. Kommunillu aqutsineq tigumialerpassuk, innuttaasunik ikiuineq sukkanerulissasoq eqqarsaataavoq.

Siunnersuut ippassaq siullermeerneqarmat, suliassanik nutserineq aningaasanik ilumut malitseqassanersoq, Atassutip Siumullu apeqquserpaat.

- Annertuumik innarluutillit ikiorsertarneri aalajangersimasumik akeqarpoq. Aningaasat atorneqartartut malinnaanissaat isumaqatigiissutaareerpoq, Maliina Abelsen oqarpoq.

Aamma kommunit akisussaaffimmik pilersaarutaasutut juulip aallaqaataaniit tigusinissamut piareersimannginnissaat partiit illua tungiliuttut ernummatigaat. Kisianni Kanukoka kommunillu sisamat tusarniaanermi nalunaarput ulloq taanna piareersimassallutik. innarluutilinnut paaqqinnittarfiit ingerlanneqarneri suli Namminersorlutik Oqartussanit akisussaafigineqassapput.

Siunnersuut aappassaaneerneqartinnagu Ilaqutariinnermut Ataatsimiititaliami suliarineqaqqaassaaq.