Innarluutilinnut atuarfik isertarfiillu pitsaanerusut kattuffiup kissaatigai

Timimikkut innarluutilippassuit inuit nalinginnaasumik ornittagaannut imaaliallaannaq isersinnaasanngillat, tamannalu innarluutillit kattufiata siulittaasuata Mette Sofie Lerchip iliuuseqarfiginialerpaa. Aamma innarlutillit atuarfittaarnissaat kattuffiup suliniutiginiarpaat.

- Isertarfiit innarluutilinnut piuminarnersutu ukiorpassuarni nilliaatigineqarput iluqutaanngitsumik, maannakkulli uagut pimoorullugit iluarsiniarniarpagut, Mette Sofie Lerch oqarpoq.

Aamma innarluutillit atuarfeqalernissaat kattuffiup suliniutiginiarpaa.

- Inuusuttut 21-leereerangamik ilinniarfinni periarfissaaruttarput, taamaattumillu ilinniarfeqalernissaat suliniutigaarput, Mette Sofie Lerch oqarpoq.

Innarluutillit atugaat pillugit kattuffiup siulittaasua oqarpoq illoqarfinni anginerusuni naiugaqartut ikiorneqarnissaminnut periarfissarissaarnerusut, nunaqarfimmiulli isorliunerusuniittullu periarfissalunnerujussuusut.

- Innarlutileqarpoq ikiorneqaqqaartigatik ukiukkut anineq ajortunik, Mette Sofie Lerch oqarpoq.

Siulittaasup kaammattuutigaa innarluutillit nalakkiginagit inoqatitut naligisatut pineqartaqqullugit.

-nallinanngillat, inuttullu allatulli ataqqineqarnissartik pisariaqartippaat, Mette Sofie Lerch oqarpoq.

Innarluutillit kattuffiat internetikkut nittartagartaarniarpoq, tamannalu upernaaru piviusungortinniarneqarpoq.