Innarluutilinnik sullissineq nuunneqassanngikkallarpoq
Ilaqutariinnermut Pisortaqarfimmit maanna nalunaarutigineqarpoq iluarsaaqqinnermi suliat unikaallatsinneqarallasasut, qaqugulu nangeqqinneqarnissaat oqaatigineqarani.
Innarluutilinnut ikiorsiisarnerup kommuninut nuunneqarnissaanut atatillugu Ilaqutariinnermut Pisortaqarfimmit, KANUKOKA-mit kiisalu komuuninit nukippassuit atorneqartussaanerat tunngavilersuutigineqarpoq.
Innarluutillit sullinneqarnerisa kommuninut nuunneqarnissaata kingunerissavaa, kommunit nammineq innarluutilinnut tunngasunik aalajangiisalernissaat taamalu marloriaammik sullissinerup pinngitsoorneqarnissaa. Ullumikkut kommunit Ilaqutariinnermut Pisortaqarfimmut akuersissutinik qinnuteqaqqaartarput, tassanilu aalajangiisoqareeraangat kommuni nalunaarfigineqartarpoq. Kommunip aningaasartuutit isumageqqaartarpai, tamatumalu kingornagut aningaasartuutit utertinnissaannik piumasaqaat Ilaqutariinnermut Pisortaqarfimmut nassiuttarlugu.
Nuna tamakkerlugu annertuumik innarluutilinnut ulloq unnuarlu paaqqinnittarfiit ullumikkut Ilaqutariinnermut Pisortaqarfimmit ingerlanneqarput, matumanilu taakkua ingerlanneqarnerisa kommuninut nuunneqarnissaat aamma pilersaarutaavoq. Tassa siunissami tamanna piumaarpoq, pilersaarutimmi massakkut unitsikkallarneqarmata.
