Innarluutilinnik sullissineq ajornakusoortoq

Allattoq Mads Lynge
oktobarip 13-at 2006 11:24

Innarluutillit sullinneqarnerannut kajumissaarut 50.000 koruunimik aningaasartalik Nuup Kommuneani innarluutilinnut sullissisut immikkoortortaqarfianut ippassaq Ilaqutariinnermut naalakkersuisumit Aleqa Hammondimit tunniunneqarpoq.

Radioaviisimiit paasisavut malillugit Nuup Kommuneani innarluutillit 250-it missaanniittut sullinneqarput.

Innarluutilinnut 250-iusunut sulisoqarniarneq qanoq innersoq pillugu Nuup kommuneani innarluutilinnut sullissivimmi ningiu Pauline Abelsen paasiniaaffigigatsinni nassuerutigaa sullissineq pitsaanerpaajunngitsoq, tassani tapersersortinik sulisoqarniarnerup ilinniarsimasunillu pissarsisinnaannginnerup ajornartorsiutaanera pissutaanerpaanut ilaasoq oqaatigaa:

- Oqarsinnaanngilanga kusanartorujussuusoq, kisianni innarluutilinnut sullissiniarnitsinni ajornartorsiuteqarpugut. Innarluutilinnut tapersersorteqartarneq ajornartorujussuuvoq, ilinniarsimasunik pissarsiniarneq ajornartorujussuummat. Pædagogitut ilinniarsimasunik imaluunniit tarnip pissusaannik ilisimasalinnik ajornanngippat pissarserusuttaraluarpugut, pissarsisinnaanatali, Pauline Abelsen oqarpoq, nangillunilu:

- Taamaammat tapersersortigut tassaanerusarput social- aamma sundhedsmedhjælperitut atuarsimasut aammalu ilinniarsimanngitsut, Pauline Abelsen oqarpoq.