Ombudsmandi: Ivaaqqami pissutsit assut pitsanngoriarsimapput
Inatsisartut Ombudsmandiannit misissuiartortut Ivaaqqami meeqqanik, inuusuttunik inersimasunillu innarluutilinnik ulloq unnuarlu paaqqinniffiusumi Qaqortumiittumi 2017-imi maajimi misissuipput, taamanilu pissutsit sakkortuumik isornartorsiorneqarput.
2017-imi misissuisoqarmat sulisut ilaqutaasullu arlallit oqaatigaat sulisunik amigaateqarneq paaqqinniffimmi annertuumik ajornartorsiutaasartoq – pingaartumik sapaatit akunnerisa naanerini aamma ullut akissarsiffiusut nalaanni, ullunilu taakkunani sulisut ilaat takkutinngitsoorsinnaasartut.Taamaattumik sulisut paaqqinniffimmi najugaqartunik anartarfimmi aqunngatitsinissaminnut, uffaanissaminnut sammisassaqartitsinissaminnullu ilaanneeriarlutik piffissaaleqisarsimapput.
Taamanilu pissutsit atuuttut isumakulunnartorujussuartut isigalugit Ombudsmandip allaaserai.
AAMMA ATUARUK Innarluutillit sapaatip akunnerminnik nalliuttorsiortut
Taamaattumik Ombudsmandeqarfimmit misissuiartortut Ivaaqqamut malitseqartitsiviusumik 2018-imi septembarimi misissuiartorput.
Ombudsmandip maanna paasisai tassaapput sulisut sulinngitsoortarnerat pissutigalugu ajornartorsiutit – taakkualu najugaqartunut kingunerisartagaat – 2017-imi maajimi misissuinermi malugineqartunut sanilliullugit malunnartumik annikilleriarsimasut.
Ivaaqqami pisortaagallartumit ilaatigut paasissutissiissutigineqarpoq sulisorisat ilarpassui allanit taarserneqarsimasut, tamannalu suliartunngitsoortoqartarneranik ajornartorsiutaasunut iluaqutaasimasoq.
Sulisut aamma ukioq manna septembarip qaammataani pikkorissartinneqarput, tamannalu aamma suliartunngitsoortarnerit ikinnerulernerinik kinguneqarsimavoq.
Misissuinerlu kingulleq pillugu nalunaarusiaq tunngavigalugu ombudsmandi allappoq Ombudsmandip Ivaaqqamik misissuinera pillugu suliaq inaarlugu suliarineqartutut maanna isigalugu.
