Innarluutilinnik isumaginninnerup aaqqissuuteqqinnissaa kinguarpoq

Tamanna pissuteqarpoq, KANUKOKA aamma Ilaqutariinnermut Pisortaqarfik decembarimi isumaqatigiissusiorsimmata, innarluutilinnik isumaginninneq, aamma aaqqissuuseqqinnermut ilaasussaagaluartoq, kommunit januaarip aallaqqaataani 2009-uinnartoq tigussagaat.

Innarluutilinnik sullissisut politikerillu maajimi ataatsimeersuarmata, isumaqatigiissutigineqarpoq, innarluutilinnik sullissineq aaqqissuuteqqinneqartariaqartoq.

Isumaqatigiissutigineqarpoq, aaqqissuusseqqinnermi qulequttat sisamat qulequtarineqassasut, tassalu ilisimasaqarfimmik sinnersuisoqarfimmillu pilersitsineq, ilinniatitsineq sulisoqarnerlu, innarluutilinnik kommuninut nuussineq kiisalu inatsisiliorneq.

Kisianni aaqqissusseqqinnissaq Naalakkersuisunit KANUKOKA-millu qaangerneqarpoq, decembarimi aalajangermata, innarluutilinnik sullissineq 2009-mi januaarip aallaqqaataani nuunneqassasoq.

- Taamaattumik massakkut pisariaqarpoq, innarluutilinnik isumaginninnerup kommuninut nuunneqarnissaanut piareersaatit assigiinngitsut maanngaanniit aallutisallugit. Tamaattumillu taanna pingaarnerutillugu massakkut aallartipparput, ilaqutariinnermut pisortaqarfimmi innarlutilinnut immikkortoqarfimmi pisortaq Naja Rosing Fleischer oqarpoq.

Taassuma neriuutigaa, aaqqissuusseqqinnermik kinguartitsinikkut innarluutilinnik sullissineq ajorseriassanngitsoq. Illuanik innarluutillit tikillugit sullissineq kommuninut nuunneqarpat, sullissisut akisussaaffik tamaat tigugunikku, sullissineq pisariinerulissasoq ilimagaa.

- Aaqqissuusseqqinnerup kinguartinneratigut nutaamik inatsisiliornissaq taavalu ilinniartiaaneq sulisoqarnerlu kinguartinneqarallarput.