Innarluutilinnik ikiorsiisarnermik kommunit tigusinissaat kinguartoq

Annertuumik innarluutillit assersuutigalugu kaassuartakkanik issiavittaarniarlutik kommuninut qinnuteqarunik, Namminersorlutik oqartussat qanoq akissuteqarnissaat suli utaqqeqqaartassavaat. Annertuumik innarluutillit ikiorserneqartarnerisa kommuninit akisussaaffigineqalernissaa ukiup affaanik kinguarpoq.

- Uanga naliliinera naapertorlugu taamaalilluta piffissaqarluarluta naammassinnissinnaanngorpugut, isumaginninnermut naalakkersuisoq Maliina Abelsen oqarpoq.

Qanoq aningaasatigut aaqqiisoqarnissaanik isumaqatigiinniarnerit suli naammassinngillat. Suliassat eqqarsaataaqqaatutut kommuninut tunniunneqaraluarpata, kommunit sinnerlugit isumaqatigiinniartut pinngitsaalineqartutut isumaqatigiissusiorsimassagaluartut, Inatsisartut ilaqutariinnermut ataatsimiititaliaata isumaliutissiissummini tikkuarpaa. Tassalu akisussaaffik januaarip aallaqqaataani aatsaat tunniunneqassaaq.

- Peqqussut inatsisartunit akuersissutigineqariarpat, nalunaarutissatut missingiut tusarniaassutigissavarput. Taava peqqussut pillugu maaji naaginnartoq pikkorissartitsissaagut. Tassa tamakkua tamarmik aasaru sulinngiffeqalertinnagu piariissapput, Maliina Abelsen oqarpoq.

Peqqussutissaq Inatsisartut siullermeerummik oqaluuserimmassuk, illua tungiliuttut partiivisa Siumup Atassutillu kommunit piareersimannginerarpaat. KNR-miimmi aamma tusarparput, kommuni ataaseq akisusaaffimmik juulip aalaqqaataaniit tigusinissamut piareersimanani nalunaarsimasoq.

Taava kommunit ilumut piareersimanersut, akisussaaffimmik tunniussinissamut qanoq apeqqutaatigisimanersoq, Maliina Abelsenimut apeqqutigaarput:

- Pingaaruteqarpoq. Kommunit immikkoortoqarfimminnik sulisuminnillu piareersarsinnaalerput. Tamanna pisariaqartinneqarsimappat, taava ajunngilaq. Tassami innarluutillit kommunit qanoq sullinneqarnerat naggataarpiaatigut apeqqutaavoq, Maliina Abelsen oqarpoq.

Annertuumik innarluutillit ikiorserneqartarnerat pillugu peqqussutikkut aningaasalersuinissamut aningaasaliinissamullu akisussaaffik Namminersorlutik Oqartussaniit kommuninut nuunneqassaaq. Akisussaaffik taanna kommuninik iluarsaaqqinnermut atatillugu suliassat nunneqartussat siulliit ilagaat.