Innarluutilik innarluutillit pisinnaatitaaffii pitsanngorsarusullugit sassartoq

Nunatsinni innarluutillit pisinnaatitaafii nukittorsartariaqarput. 29-nik ukiulik Inuit Ataqatigiit sinnerlugu Inatsisartunut qinigassanngortittoq, Marita Jessen taama isumaqarpoq.

Marita Jessen issiavimmik kaassuartakkamik atuisuuvoq. Taamaattumik innarluutillit pisinnaatitaafiinut pitsanngorsaaqataasinnaasorivoq. Namminermi sassanngikkuni kina sassasagami? taanna aperivoq.

- Inatsisit piviusullu ullumikkut equngapput. Soorlu assersuutigalugu pisinnaatitaaffiit FN-ip oqariartuutaat aamma atsioqatigiinneqarnikut Kalaallit Nunaat eqqarsaatigissagaanni iluamik atorneqanngillat. Taava taakku iliuuseqarfigerusunnaramik, Inuit Ataqatigiit sinnerlugu qinigassanngortittoq, Marita Jessen oqarpoq.

AAMMA ATUARUK Innarluutillit illersuisuat: Taamaammat soraarniuteqarpunga

Marita Jessen 2013-mi 22-nik ukioqarluni piffissaatillugu eqqortumik nakorsarneqannginnami, niuata aappaa kipineqarpoq.

Niuersinnerata kingorna piffissaq imaannaasimanngilaq. Annilaangarujussuartalerpoq imigassamillu aalakoornartumik atuivallaarluni.

Maanna ukiut arfineq pingasut qaangiuttut oqaluttuaq allaavoq. Marita Jessenimi ilinniakkani naammassiinnarnagu Inatsisartunut qinigassanngortippoq.

Naalagaaffiit Peqatigiit innarluutillit pillugit isumaqatigiissutaat Danmarkimit akuersissutigineqarmat nunatsinnut aamma atuuttussaalerpoq.

Inuit innarluutillit allatulli avatangiisinut tamanut isersinnaassasut ssumaqatigiissummi immikkoortoq 9-mi allaqqavoq, tamannali eqquutsinneqartuaannanngitsoq Marita Jessenip nammineerluni misiginikuuvaa - assersuuteqarporlu:

Marita Jessenip matumi nammineerluni ammarsinnaannginnamiuk isumaginninnermut siunnersortitut atuarnermi tamaat atuarfimminut isersinnaanissamut anisinnaanissamullu inuit allat isumalluutigiuartariaqartarpai.

- Sumiippa taava pisinnaatitaaffiga? Marita Jessen aperaaq.

AAMMA ATUARUK Tusilartut nutserisussaqanngillat

Taanna innarluutillit pisinnaatitaaffii nukittorsarniarlugit politikkip silarsuaanut maanna sassarpoq, innarluutillit ilinniaqqikkusuttut atugaat ilaatigut pitsanngorsarusullugit.

Assersuutigalugu tusilartut ilinnialernissaminni pisariaqartitaminnik ikiorserneqarnissaat, timimikkullu innarluutillit ilinniarnermi inissaqartitaanissaat qulakkeerneqartariqarpoq.

Aningaasalli sumingaanniissanersut erseqqissumik akiuminaatsippaa, pingaarnersiuisoqartariaqartoq isumaqarpoq.

- Sooruna taava FN-ip anguniagaani inuit innarluutillit pisussaaffeqalereerluta - sooruna aningaasat aamma tassunga siulliunneqanngitsut?, Marita Jessen aperaaq.

AAMMA ATUARUK Skizofrenertumut ataataq: Tarnikkut innarluutillit akuersaarnerusariaqarpagut

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl