Ivaaraq pillugu suliap kingorna nalunaarusiaq nutaaq: Innarliisoqannginnissaata qulakkeernissaa oqartussaasut akisussaaffigaat

Nalunaarusiap nutaap kingorna Tiliumit ilaatigut innersuussutigineqarpoq inuit innarluutillit kingulerluuteqarnermi neqeroorutinik periarfissaqarnissaat oqartussaasunit qulakkeerneqassasoq.

Allattoq Teitur Larsen

aggustip 28-at 2023 12:39

Nutserisoq Paornánguak Kleist

Oqartussaasut najugaqarfissatut neqeroorutinik nakkutilliisariaqarput inuillu innarluutillit innarlerneqarsimanermik nalunaaruteqarsinnaanissaat qulakkeerlugu.

Taama Inuit Pisinnaatitaaffii pillugit Siunnersuisoqatigiit aamma Institut for Menneskerettigheder suleqatigalugit Tiliup nalunaarusiaani nutaami innersuussuterpassuit ilaat nipeqarpoq.

Taama Tilioq tusagassiorfinnut nalunaarummi allappoq.

Nalunaarusiaq Ivaaraq pillugu suliamut qisuariaatitut saqqummersinneqarpoq, tassani arnaq arlalinnik innarluutilik 23-nik ukiulik tassanngaannaq napparsimmaviliaanneqarsimalluni tamaniillu tupaallaatigineqartumik ernertaarluni.

Arnaq pisussinnaanngilaq oqalussinnaananilu nangeqartarlunilu.

MEEQQANUT, INUUSUTTUNUT ILAQUTARIINNULLU NAALAKKERSUISOQARFIMMUT INNERSUUSSUTIT

Inuit innarluutillit kinguaassiuutimikkut atornerlunneqarsimasut pillugit tunngaviusumik ilisimasaqarnerup pitsaanerulernissaa, kiisalu eqimattat taakku nalunaaruteqarnissamut pisaatsit pillugit ilisimasaqarnerulernissaq qilakkeerneqassaaq.
Najugaqarfissatut aamma ulloq unnuarlu neqeroorutini najugaqartunut kinguaassiuutitigut atornerluinerit pinaveersaartinneqarnissaannik qulakkeerisumik najoqqutassiortoqassaaq.
Najugaqarfissatut aamma ulloq unnuarlu neqeroorutini najugaqartunut atoqatigiinneq pillugu paasititsiniaaneq aamma atoqatigiinnermi peqqissutsip pitsanngorsarnissaannut iliuuseqarnissaq.
Inunnut innarluutilinnut kinguaassiuutitigut atornerlunneqarsimasunut kingunerluutinut naleqquttunik neqeroorutit qulakkeernissaat.

Angut 62-inik ukiulik novembarimi tigusarineqarpoq Kalaallit Nunaanni Politiinit pinngitsaaliinertut taaneqartumik tunngaveqartumik, arnaq oqarnerattut akuersisinnaanngimmat.

Kinguninngua killisiorneqarami nassuerpoq arnamik pinngitsaaliisimalluni.

- Inuit innarluutillit ulloq unnuarlu paaqqinnittarfinniittut innarluuteqarnertik najugaqarnertillu pissutigalugit marloriaammik aarlerinartorsiornerupput. Taamaattumik pisortaqarfiit kannguttaatsuliornerit pinngitsoortinniarlugit sakkortusisamik akisussaaffeqarput, Inuit Innarluutillit Illersuisuat Anja Hynne Nielsen tusagassiorfinnut nalunaarummi oqarpoq.

Nunani tamalaani misissuinerit takutippaat inuit najugaqarfissatut neqeroorutini paaqqinnittarfinnilu najugaqartut allanut sanilliullugit kinguaassiuutitigut atornerlunneqakkajunnerusartut.

Tapersersuineq kingunerluutilinnullu neqeroorut

Tiliup erseqqissarpaa, inuit innarluutillit kinguaassiuutitigut atornerlunneqarsimasut kingunerluutiminnik katsorsartinnissamut neqerooruteqarfigineqassasut.

Aamma atuarukIsumaginninnermi aqutsisoqarfik Ivaararlu angajoqqaat piumasaqaataannut arfineq-marlunnut maanna akissuteqartut

- Tamanna inuup pisinnaatitaaffiini qulakkeerneqarnikuuvoq, tassa inuit innarluutilllit kinguaassiuutitigut kannguttaatsuliorfigineqarnikut tapersersorneqarlutillu piginnaanngorsaqqinneqassapput. Eqqugaasut timikkut tarnikkullu kingunerluutigisimasatik pillugit katsorsarneqarlutillu inooqataaleqqinnissamut ikiuinerussaaq, Louise Holck, Institut for Menneskerettighederimi pisortaq tusagassiorfinnut nalunaarummi oqarpoq.

Nalunaarusiami aamma innersuussutigineqarpoq inuit innarluutillit innarlerneqarsimanerminnik nalunaaruteqarnissamut periarfissinneqarnissaat innarlerneqaqqinnissallu pinaveersaartinneqarnissaat oqartussaasunit qulakkeerneqassasut.

Nutaarsiassami kukkunermik nassaarsimaguit uunga allaffigineqarsinnaavugut.