Innaallagissap aqqutaasa attuussartarnerat qamittoortitsisarpoq

Nuummi innaallagiaq ulluni kingullerni qamittooqattaartartoq maluginiarneqartarpoq

Qamittoortarnerni ajornartorsiutaavoq Utoqqarmiut Kangerluarsunnguanni innaallagissiorfimmiit ledningit silaannakkoortut imminut attuussartarnerat.

Nukissiorfimmi teknikikkut aqutsinermi pisortaq

Svenning Møller oqaluttuarpoq ledningini innaallagissamik 132.000 Volt-imik sakkortutigisunik ingerlaartoqartartoq, niggileraangallu ledningit imminut attuuttarnermikkut sarfaaruttoortitsisartut.

Svenning Møller aamma oqarpoq ledningit sukaterneqaannarsinnaasutut isumaqartartoqartartoq, tamannali napparutit sapissagaat.

Nukissiorfiit allaanernik pilersaaruteqarput, eqqarsaatigineqarpormi ledninginut attuussaannaveersaatinik ikkussuisoqassasoq, qaquguli taamaaliortoqarsinnaanera Svenning Møller oqaatigisinnaannginnerarpaa. Ledninginut attuussaannaveersaatinik ikkussuinissaq qanoq akeqassanersoq aamma ilisimaneqanngilaq.