Innaallagissamut imermullu atukkat uuttuutitaalerput

Innaaallagissamut, imermut kiassarnermullu atuinermik uuttuutit 30.000 missaaniittut ungasianiit nalunaarsorneqarsinnaasunik taarsersorneqassapput, Nukissiorfiit tusagassiuutinut nalunaarumminni allapput.
Allattoq Jaaku Lyberth
decembarip 01-at 2007 13:39

Innaallagissamik, imermik kiassarnermillu atuinermut uuttuutit ungasianiit uuttuummik taarserneqarneratigut, nalunaarsuineq nammineerluni pisalissaaq.

Uuttuutit ataasiakkaat nassitsissutinnguaqassapput uuttuummut attaveqaataasussamik. Ullut tamaasa nassitsissutip atuineq qitiusumi nalunaarsuivimmut nalunaarutigisassavaa.

Maajip qaammataani ukiormanna nunatsinni siullerpaatut Sarfannguani Sisimiut pigisaani uuttuutit tamarmik taarserneqarput, taamaaliornermilu misilittakkat tunngavilugit periuseq taanna nunatsinni tamarmi atulissasoq Nukissiorfinni aalajangerneqarpoq.

Uuttuutinik taarsersuineq Nuummi aallartinneqassaaq, ukiorlu 2008 naatinnagu uuttuutit 12.000 missaaniittut tamarmik taarserneqarsimassapput.

Ukioq 2007 naatinnagu illoqarfiup immikkoortuani Qinngutsinni uuttuutit taarserneqariissapput, taamaalilluta Nuup immikkoortortaqarfiani taakku misiliutitut atorneqassallutik.

Uuttuutit taarsersorneqarnerat ukioq 2014-imi naammassineqassasoq Nukissiorfimmit naatsorsuutigineqarpoq