Innaallagissamut atuinikitsuinnaat atugarinialerpaat
Ukiut pingasut qaangiuppata Australiami qullernut pærit atuinikitsut pæritoqqat nalinginnaasut taarsereersimassavaat. Australiami naalakkersuisut taamaalillutik silaannarmut CO2-mik aniatittakkatik annikilliserujussuarniarpaat aamma nunarsuarmiut allat tamarmik taamiliussasaut neriuutigaat.
Aammattaaq Californiami qullernut pæritoqqat atorunnaarlugit pærit nukimmik atuinnginnerusut kisimik atugaalernissaat eqqarsaatigineqartarpoq, mannali tikillugu tamanna eqqarsaataaginnarluni.
Kisianni qullernut pæri qanganisaq, pærimut nukimmik atuinnginnerusumut sanilliullugu, sisamariaammik tallimariaammilluunniit nukimmik atuinerusarpoq.
Australiami avatangiisinut ministerip naatsorsuinera naapertorlugu Australiap ukiut pingasut qaangiuppata ukiumut gassi C02 aniatinneqartartoq 4 million tonsinik minnerulersissinnaagaluarpaa. Aamma taanna oqarpoq, nunarsuarmiut tamarmik taamaalioraluarpata Australiamiut innaallagiap ukiumut atortagaata tallimariaataa sipaarneqarsinnaagaluartoq.
Danmarkimi qulliup pæriinik sipaarnartunik atuileriartorneq inerteqquteqarneq aqqutiginagu ingerlanneqarpoq. Suliniummi elsparefondenimi siulittaasoq Poul Erik Pedersen inerteqquteqarnissaq ajornakusuussaqisoq.
- Eqqaamassavarput pæritoqqat kulturitsinnut ilaalluinnarmata. Aamma qullernut pæritoqqat nutaaninngaanniit allaanerusumik qaamaneqarsinnaasarput. Ukiut qulit qaangiuppata pissutsit allanngorluinnarsimassapput. Qularnanngilaq qullernut pæritoqqat atorunnaangajassimassapput pærinillu nukinnik atuinikitsunit allanit taarserneqarsimassallutik, Poul Erik Pedersen naggasiivoq.
Nunatsinni Avatangiisinut suliniaqatigiiffik Avataq Nuummi tamanna pillugu paasisitsiniaalluni aallartippoq. Tamatumani nunatsinni angerlarsimaffiit qullernut pærinik nukinnik atuinikitsunik atuinerulernissaat siunertarineqarpoq.
Qullernut pærinik nukinnik atuinikitsunik atuineq C02-mik aniatitsinermut minnerulersitsiinnarani aningaasanik sipaarutaasinnaavoq. Avatamit oqaatigineqarpoq angerlarsimafimmi pærit arfineq-marluk pærinik nukinnik atuinikitsunik taarseraanni ukiumut 500 koruunit sipaarneqarsinnaasut.
