Innaallagissamik atuineq nittartakkatigut malittarineqarsinnaalissaaq

Tassami sakkussaq nutaarluinnaq, webimik tunngavilik, aammalu inuit ataasiakkaat innaallagissamik nalunaaquttap akunneranit nalunaaquttap akunneranut atuisinnaalersitsisoq, Nukissiorfiit atulersissammassuk.

Periarfissamili nutaami piumasarineqarpoq atuinermut uuttuut nutaaq ungasianiit atuarneqarsinnaasoq pigineqassasoq. Taamatut ittoq Nukissiorfiit Nunatsinni sumiiffinni assigiinngitsuni tamaani ikkussorlugu aallartilluareerpaat, tamatumanilu 47 procentit taarsersorneqareerlutik.

Uuuttuutini ungasianiit atuarneqarsinnaasuni nutaani aammattaaq Nukissiorfiit periarfissaqarput innaallagissamut akiligassaq akilerneqarsimanngippat pilersuineq ungasianiit ammarlugulu matussallugu. Tamatumalu kingunerissavaa matusinermut akitsuutip immaqalu pingaarnerusumik uuttuutinik ammaaqqinneq akikillissammat.

Pilersaarutini arlaqartuni Nukissiorfiit pisortaq Svend Hardenberg nersualaarpaat periaaseq nutaaq ileqqaarniuteqarnernik kinguneqassammat.

- Periaaseq sakkussaavoq atuisumut aningaasatigut ileqqaarutaasoq silamullu tamatta ataatsimut akisussaaqataanitsinnut iluaqutaasoq, Nukissiorfiit pisortaat Svend Hardenberg oqarpoq.