Inissiisarfik matoqqasoq ukiut tallimat qaangiuppata

Pinerluuteqarsimasunut inissiisarfissaq Nuummi saviminernut eqqaaviup avannaatungaaniissaaq. Kommuneqarfik Sermersuumi kommunalbestyrelsip ippassaq ataatsimiikkami tamanna aalajangerpaa.
marsip 24-at 2010 04:48

Nunagissaanissamut aningaasartuutissat 31 millionit koruuniussasut naatsorsuigallarnerit takutippaat. Namminersorlutik Oqartussat aamma Kommuneqarfik Sermersooq taakku agguataarnissaat pillugu isumaqatigiinniassasut, Kommuneqarfik Sermersuup nittartagaani tamanna atuarneqarsinnaavoq.

Nuummi maanna pinerluuteqarsimasunut inissiisarfimmiittut aamma kalaallit Danmarkimi Herstedvesterimiittut pinerluuteqarsimasunut inisiissarfissami inissaqassapput, Herstedvesterimiittut matoqqasumiitinneqassallutik.

Kommuneqarfik Sermersuumi Sanaartornermut Avatangiisinullu ataatsimiititaliaq isumaqarpoq, pinerluttunut navianartunut matoqqasumik pinerluuteqarsimasunut inissiisarfissap ilaa Quassussuarmi qaqqap iluani inissinneqassasoq. Sermitsiaq.ag-ip nittartagaani tamanna ilisimatitsissutigineqarpoq.

Inissiisarfissap eqqaa tamarmi meterinik arfinilinnik portutigisumik isumannaallisakkamik, 100 meterimiit 200 meterimut takitigisumik, ungaluneqassaaq.

Pinerluuteqarsimasunut inissiisarfissaq matoqqasoq pilersaarutit malillugit 2015-imi januaarip ulluisa aallaqqaataanni atuutilissangatinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq