Inissiisarfiit amerlineqarnissaat pilersaarutaanngikkallarpoq
- Utaqqisorpassut pillugit eqqartuivugut aammalu inissiisarfinni pissutsit ajorsinnaasut eqqartorlutigit. Ukiaq siullermik ataatsimeeqatigigakku apeqqutit taamani akinngisai ippassaq ataatsimeeqatiginerani uteqqillugit apeqqutigaakka, Sara Olsvig oqarpoq, nangillunilu oqaatigalugu danskitnaalakkersuisuisa maani Nunatsinni inissiisarfiit pillugit aaqqiissuteqarniarnertik utaqqisillugulusooq ikkaat, tamannalu inatsiseqarnermut ministerimut apeqqutigaa, erseqqissumilli akineqarani. Tamannalu pillugu Sara Olsvigip ministerimut erseqqissaatigaa, pissutsit ilugersunarneri erngerlugit aaqqinneqartariaqarneri. Sara Olsvigilli paasisinnaanerarpaa, aaqqiiniarnerni paasissutissat amerlasuut paasiniarneqaqqaartariaqarnerisa qanoq iliuuseqarniarneq kigaallisissimaarmagu.
- Utaqqisut amerlavallaarujussuarneri isertorneqarsinnaanngilaq aammalu akuerineqarsinnaanani, taamaattumillu suliaq nukigiullugu pisariaqartoq ministerimut oqaatigalugu, Sara Olsvig oqarpoq.
Isertitsivik matoqqasoq pilersaarutaasorlu ministerip eqqartugaanut ilaasoq, Sara Olsvigip oqaatigaa, nangillunilu.
- Kisianni uanga paasisakka naapertorlugit isertitsivik matoqqasoq pilersikkaluarutsiguluunniit inissat amerlinavianngitsut eqqaavara, Sara Olsvig oqarpoq.
Taassuma ministerimut allagaqarnermini ilaatigut eqqaavaa, Danmarkip Nunatsinni inatsiseqarneq pillugu suli akisussaasuummat, taamaammat Nunatsinni atugassarititaasut pitsaasuunissaat aamma akisussaaffigimmassuk tamanna pingaartillugu suliniutigisariaqartoq.
Pinerlussimasut eqqartuunneqareersullu inissaqartinneqannginnerat pillugu aammalu aaqqiissutissat suut pilersaarutaanersut, danskit inatsiseqarnermut ministeriat, Morten Bødskov oqaaseqartinniarsimagaluarparput, taassumali apersorneqarnissani kissaatigisimanngilaa.
Inatsiseqarneq pillugu Naalakkersuisoq, Anthon Frederiksen aamma danskit inatsiseqarnermut ministeriat Morten Bødskov ataasinngorpat ataatsimeeqatigiissapput.
