Inissiat pillugit isorinnittoq Sermersuumi qinigassanngortittoq
Demokraatineersup Lotte Sara Rasmussenip Nuummi inissiarsuit pisoqalisut aserfallakkaluttuinnarnerini pisortat isiginngitsuusaarnerarlugit siornatigut isornartorsiorsimavai. Tamanna pissutigalugu Kommuneqarfik Sermersuumi kommunalbestyrelsimut maanna qinigassanngortippoq, Demokraatit tusagassiorfinnut nalunaaruteqarlutik taama allapput.
Demokraatit sassartitaat Qapiarfiusaami najugaqarpoq, Nuummilu inissiarsuarni pisoqqani inissiat sammineqarnissaat pillugu ukiaq suliniuteqarpoq, ilaatigut najugaqartut peqatigiiffiat peqatigalugu atsiornernik katersilluni.
Taamatullu suliniuteqarnini, kommunimut apriilip qaammataani qinigaassaguni, Kommuneqarfik Sermersuumi kommunalbestyrelsimi ingerlateqqikkusuppaa.
- Piffissanngorpoq arlaata akisussaaffimmik tigusinissaa misissorlugulu kina sumut akisussaanersoq aamma attartornermut akiliuterpassuit qanoq atorneqartarnersut. Kommunip aqutsiviani sissuertoorusuppunga, Lotte Sara Rasmussen tusagassiorfinnut nalunaarummi taama oqarpoq.
Demokraatit qinigassanngortitaat qinigaassaguni Kommuneqarfik Sermersuumi Sanaartornermut Avatangiisinullu ataatsimiititaliami ilaasortanngornissani sulissutiginiarpaa.
