Inissiat PCB-mik akoqarnersut misissorneqalerpoq
Peqqinnissaqarfimmik Aqutsisoqarfik tassunga atatillugu saaffigineqarsimasoq, Avatangiisinut Aqutsisoqarfimmi pisortaq Steffen Ulrich-Lynge oqarpoq. Misissuinermi inernerit sumut atorneqassanersut
apeqqutigaarput, imatullu akivoq:
- Inernerit arlalitsigut atorneqartussaapput. Inissianik iluarsaasseqqinnermi sulisut qanoq ilinikkut iluarsaassisinnaassanersut paasiniarneqassaaq, inissianilu najugaqartut PCB-mit aallaavilimmiit ajoquserneqarsimanersut paasiniarneqassalluni, Steffen Ulrich-Lynge oqarpoq.
Nuummi Tuapannguani Blok Q, R aamma S isaterneqaqqammerput, sinnerilu Nuuk Imerup tunuanut immamut iginneqarnikuullutik. Taakku PCB-mik akoqassusaat maanna misissorneqassaaq.
PCB suliffissuarnit siornatigut atorneqarnikuuvoq, motoorit uulialerneqarnerannut motoorinullu nillasaatitut atorneqartarnikuulluni.
Sanaartornermi aamma atorneqartarnikuuvoq, qalipaanermi igalaanillu ikkussuinermi atorneqartartumi, danskisut fugemassemi, atorneqartarnikuulluni. PCB 1980-ikkuni inerteqqutaalerpoq.
PCB arrortikkuminaatsuuvoq, timmissani, puisini, nannunilu nassaassaalluni. PCB pissusissamisuunngitsumik hormoneqalersitsisinnaavoq kræfteqalersitsisinnaallunilu. Ilisimatuut Danmarkip Avatangiisinut Misissuisoqarfianneersut Aarhusillu Universitetianeersut PCB pillugu ilaatigut misissuinikuupput, nalunaarusiornikuullutillu.
Inissiat Blok Q-tut, R-itut S-itullu ittut sineriak tamakkiusavillugu sanaartorneqarnikuummata Steffen Ulrich-Lynge aperaarput innuttaasut ernumassutissaqarnersut, akivorlu:
- Qanoq ernumassutissaqartigissanersut oqaatigiuminaappoq, kisianni inigisap iluani silaannaap qanoq issusia apeqqutaasarpoq, taamaammat inissiap silaannarissarluarnissaa pingaaruteqarpoq, Avatangiisinut Pinngortitamullu Aqutsisoqarfimmi pisortaq Steffen Ulrich-Lynge taama oqarpoq.
Aqutsisoqarfiup misissuitsinerata inerneri apriilip naajartulernerani pineqarsinnaanissaat neriuutigineqarpoq.
PCB-p sanaartornermi atorneqarsimasup inunnut sunniutai suli misissuiffigineqarsimanngimammata maanna piffissanngortoq, Danmarkip Avatangiisinut Misissuisoqarfiani ilisimatuup immikkoortortamilu aqutsisup Henrik Skovip oqaatigaa.