VIDEO Inissiat immikkut kiassarnermut uuttuuteqalernissaat isumaqatigineqarpoq
Inissiat 1960-70-ikkunni sanaat amerlanerpaat kiassarnermut immikkut uuttuuteqanngillat. Namminersorlutik Oqartussat inissiaatai 6.000-it missaanniittut kiassarnermut aamma uuttuuteqanngillat. Uuttuut inimut ataatsimut ikkunneqartussaq 8.000 koruunit tungaanut akeqartussaq misissuinerup takutippaa.
Inissiat kiassarnermut immikkut uuttuuteqanngitsut blokkip imaluunniit majuartarfeqatigiit ataatsip ataatsimut atuinera agguaqatigiissillugu akilertarpaat. Tassa imaappoq inissiat ilai kiassarnermik atuinikinnerusinnaapput ilaalu atuinerullutik kisiannili atuineq malinnagu agguaqatigiissilluguli kiassarnermut akiliisarlutik.
Nuummilu innuttaasut apersorneranni, apersorneqartut amerlanerit ataatsimut akiliisarneq iluarinngikkaat erserpoq.
Inatsisartuni oqaluuserineqarnerani aamma erserpoq amerlanerussuteqartut tamassuma allanngortinnissaa piumagaat. Naalakkersuisullu misissuisitsinialerput, 2017-imilu misissuinerup inerneri takoriarlugit qanorpiaq iliortoqarumaarnera Naalakkersuisut Inatsisartullu oqaluuserissavaat aalajangiiffigalugulu.
