Inissiat iluamik iluarsartuunneqartannginnerat oqunitsitsisarpoq

Narsami A/S INI-p inissiaataanni ineqartut peqatigiiffianni siulittaasoq naammagittaalliorpoq, inissiat iluarsartuunneqarmata silaannarissarfiit pitsanngorsarneqarsimanngimmata.

- 1995-mi inissiat Narsamiittut iluarsaanneqarput. Suut aaqqinneqarsinnaasut tamarmik aaqqinneqarput, silaannarissarfiilli qiviarneqanngillalluunniit. Silaannarissarfiit taarsersorneqarsimasuuppata oquit takussaajunnaamisimassagaluarmata. Narsami A/S INI-p inissiaataanni ineqartut peqatigiiffianni siulittaasoq, Theo Kruse taama oqarpoq.

Inissiat nutarterneqarnerannut atatillugu inissiamut akigititaq marloriaammik akeqalerpoq.

- Nutarterneqaput, taamarujussuarlu inimut akiut qaffalluni. Uffarfimmi silaannarissartarfiit mikisuaqqat attorneqanngillat, Theo Kruse oqarpoq.

Oquit suli takussaajuarneri aammalu inissiat iluarsartuunneqarnerata kingorna inigisamut akiliutit qaffanneri Theo Kruse-p kusanaagaa:

Nuummi inissiat Kalaallit Nunaanni oqoqarnerit ilagigaat paasineqarnikuupput. Ukiuni quligiluani inissiami oquttumi najugaqarsimasup, Sofie Ezekiassenip oquit napparsimassutigilersimavai.

- Inuunilullunga, sinikulaarlunga qasujallungalu misigisimasarpunga. Siullermik naartunera taamaattarninnut pisuutikkaluarpara. Ernereernerma kingorna erneralu napparsimavimmut unikulaarpugut, Sofie Ezekiassen oqarpoq.

Taanna naapparsimasalermat nakorsat paasisinnaasimanngilaat suna ajoqutigineraa, sivitsunngitsorli paasivaat oquit napparsimassutigisarsimagunarai.

Sofie Ezekiassen inissiami najugaqarnermi nalaani meerartaarpoq, ernertaavalu inunngoriitsiaannarluni napparsimasalermat nakorsaatinik peqqissarneqartaraluarpoq. Aatsaalli allamik initaarnermi kingorna ernera pitsanngorpoq, allaat nakorsaatitussaarluni.

Inissiami oquttumi najugaqarnermi nalaani ini silaannarissartaraluarpaa, iluaqutaanngitsumilli.

- Oqummik ersittoqanngikkaluartoq taamaattoq oqoqarnera naamasinnaavarput, Sofie Ezekiassen naggasiivoq.