Inissiat ilaat isaterneqassapput

Inissiat attartortittakkat Namminersornerullutik Oqartussat pigisaat iluarsaanneqangaatsiassammata aningaasaliingaatsiartoqariaannaavoq.

Aningaasaliissuteqarnissaq akisoorujussuusinnaammat inissiat attartortittakkat Namminersornerullutik Oqartussanit pigineqartut iluarsaanneqassanersut isaterneqassanersulluunniit siunissami nalilerneqartalissasut aalajangerneqarpoq.

Aningaasanut inatsisissamut atatillugu siunnersuutigineqarpoq, Nuummi inissiarsuit Blok Q, R, S-ilu isaterneqariarlutik piginneqatigiilluni inissianik sanaartortoqassasoq.

- Ilaqutariinni inuit marluk SIK-mut isumaqatigiissutit malillugit isertitaqartarpata, ilaqutariit piginneqatigiilluni inissialiassanut qaammammut ineqarnermut akiliutinik akiliisinnaanissaat anguniarusupparput. Erseqqissaatigissavarali maanna attartortuusut piginneqatigiilluni inissialiassanut salliutinneqassammata, inissiamillu namminerisamik pigisaqalertussat ileqqaagaqartarlutik aallartitsissammata, ileqqaartoqarnissaanik kaammattuissaanga, Ineqarnermut Naalakkersuisoq Jørgen Wæver Johansen oqarpoq.