Inissiat ikuallammata inissarsitsitseqqinnissaq pisariaqartoq
Ikuallannermi inuk ataaseq ajunaarpoq ikuallaffiusumilu najugallit qulit, politiit marluk portørilu ataaseq putsumik iioraasimanersut napparsimmavimmi misissorneqarput.
Inuunerminnilli navianartorsiunngittut Nuummi politiit ilisimatitsissutigaat.
Utoqqaat sumi inissarsigallarneqassanersut inissiaatileqatigiit Iseritip maannakkut misissuleruttoraa, Kommuneqarfik Sermersooq nalunaarpoq.
Suna pissutaanersoq suli ilisimaneqanngilaq
Kommuneqarfik Sermersuumi atugarissaarneq pillugu immikkoortortami pisortaq ima oqaluttuarpoq:
- Qanoq pisoqarsimanersoq paasiniarsimavarput, politiit ullaanerani attaveqarfigalugit akunnattoornissamullu upalungaarsimasut aggersarlugit. Taava aamma ikuallannermi eqqugaasut arlaatigut ikiugassaappata piareersimavugut aammalu napparsimmavik attaveqarfigalugu, uninngasut angerlatitassaanersut paasiniarlugu. Napparsimmaviup ilimagaa ullumi angerlarumaartut, Grethe Nielsen oqarpoq.
Ikuallattoqarsimatillugu misissuisartut suna ikuallannermut pissutaasinnaanersoq misissoriartorlugu ullaaq ikuallaffiusumukarput. Ikuallaffiusup eqqaa ornitsaalillugu assersugaavoq. Ikuallannermut suna pissutaanersoq oqaatigissallugu politiit naapertorlugit siusippallaarpoq.
Aamma atuaruk Nuummi ikuallattoqarnerani inuk ataaseq ajunaartoq
kommuni Iserittilu utoqqaat ikuallaffiusumi najugaqartut inissarsiseqqinnissaannut periarfissanik ujaarlerput.
- Soorunami aamma pingaartissimavarput Iserittip oqaloqatiginissaa, taakkualu inissarsititseqqiinissamut misissuipput qassillu inissarsititseqqinneqassanersut misissorlugu, Grethe Nielsen oqarpoq.
Politiit ippassaq unnukkut nalunaaqutaq 23.49 ikuallattoqarneranik kalerrinneqarput, qatserisartullu peqatigalugit utoqqarnut inissianut ikuallattumut ornigupput. Inuk ataaseq ajunaarpoq.
Nuummi politiit ajunaartup kinaassusaanik, qassinik ukioqarneranik suiaassusaanilluunniit suli oqaaseqarsinnaanatik KNR-imut nalunaarput.
Sermersooq oqarasuaatikkut saaffiusinnaasumik pilersitsisoq
Kommuneqarfik Sermersooq aamma innutaasut ikuallannermik eqqugaasut ilaqutaasulluunniit oqarasuaatikkut saaffiusinnaasaannik pilersitsivoq.
Oqarasuaat ima normoqartoq: 367281 sisamap tungaanut ammassaaq.
Kommuni aamma isumaginninnermi siunnersortimik ataatsimik ikuallannermut tunngasumik immikkut suliaqartitsivoq, taamaammallu ikuallassimasumi najugaqartut saniliusulluunniit ikiorneqarnissamik pisariaqartititsisut kommunip nittartagaani paasisutissarsiorsinnaapput.