Inissiat atorfimmut atasut naliginnaasunngorsinnaanngorput

novembarip 24-at 2006 15:59

Suliffimmut atatillugu inissiamik attartortut, inissiaq attartugartik ukiut arfineq-marluk inigisimagunikku, inigisaminnik naliginnaasutut attartortunngorsinnaanerat pisinnaalerpoq.

Inissiamik attartornermut tunngatillugu inatsimmik allannguinissaq, Inatsisartut ukiaanerani ataatsimiinneranni akuersissutigineqarpoq.

Utoqqalinersiaqalernissaq qanillisimappat, ukiut pingasuinnaat suliffimmut atatillugu inigisaq, naliginnaasumik attartukkatut pigineqarsinnaalissaaq.

Suliffimmut atatillugu inigisaq naliginnaasutut attartugarilerniaraanni, siornatigut piumasaqaataasimagaluarpoq, inissarsiortutut allattorsimaffimmiittuunissaq.

Suliffimmut atatillugu inigisaq naliginnaasututut attartugarilerusukkaanni qinnuteqaat illoqarfigisami inissiaatitileqatigiiffimmut nassiunneqassaaq.

- Naalakkersuisut angorusussimavaat, inissamik attartortut, suliffimmut pituttugaannginnerusumik, inissamik attartortunngorsinnaanissaat, Ineqarnermut Naalakkersuisoq Jørgen Wæver Johansen oqarpoq.