Inissiat allat aamma PCB-eqarput
Nuummi inissiarsuit allat sisamat aamma PCB-mik akoqartut maanna ilisimaneqalerpoq. Nassaarfigineqarsimasut tassaapput blok 4, 13, 17 aamma 37.
Blok 4-mi blok 13-imilu illorsuit atortuisa ilaanni PCB-mik angisuumik nassaartoqarsimavoq, blok 17-mi blok 37 mikisuinnarmik nassaartoqarluni. Najugaqartulli inissiamiikkaluarlutik peqqinnissamikkut ulorianartorsiunngillat. Skandinavisk Bio-Medicinsk Instituttip aamma Inuplanip misissuinerisa tamanna takutipppaat.
Blok Q ingutserneqarmat, taassuma betonitaa PCB-taqartoq, maannamut uppernasisatuaavoq.
Asbest pillugu Nunatsinni ukiualuit qangiuttut oqallittoqaqaaq.
Sanaartukkani PCB-qartoq aammalu taanna peqqinnissamut ulorianartuusoq, oqartussanit taamanikkut naluneqanngitsoq Anthon Frederiksen oqarpoq.
- Taamanikkut oqallittoqaqaaq, sanaartukkat ilaat asbesteqarnersut misissorneqarput. Taamaammat taamanili PCB ilanngullugu eqqarrtuisoqanngimmat eqqumiigaara, Anthon Frederiksen oqarpoq.
Tuapannguaniittup Blok Q-p, ingutserneqarneranut atatillugu, PCB-mik nassaarnerup kingorna misissuineq aallartinneqarpoq. Blok Q-mik ingutserinermut atatillugu aamma blok R S-ilu ingutserneqarput, taakkunanngalu betonikut Nuuk Imerup saqqaani nunniornermi atugassatut iginneqarlutik.
Ingutserisoq betonikunik mingutsinneqarsimanngitsunik taamaallaat eqqaanissamut akuerineqarpoq. Kisianni Siunnersuisartoqatigiinni COWI-meersut kingusinnerusukkut misissuigamik paasivaat, blok Q-mi sanaartornermut atukkat PCB-taqartut.
Tassalu suliarinnissimasup maanna misissortussanngorpaa, blokkit R-ip aamma S-ip betonitai qanoq PCB-qartiginersoq.
Kisianni Anthon Frederiksen oqarpoq, PCB-talinnik saliinermi aningaasartuutinut suliarinnittoq akiliisinneqassanersoq suli oqaatigineqarsinnaangitsoq.
- Suliami paasisassat tamarmik pissarsiarineqareeriarpata, tamanna akisinnaalissavarput. Aamma Namminersorlutik OQartussat akileeqatariataarsinnaanersut taamanikkussaq paasinarsissaaq, nunamut namminermut naalakkersuisoq oqarpoq.
Nunatsinni sumiiffinni amerlanerusuni PCB-qarnersoq Naalakkersuisut maanna siunniuppaat.
PCB peqqinnissamut ulorianartuuvoq, timip nappaatinut illersuutaanut ajoqutaalluni, hormoninik allanngortitsisarluni kræfteqalissutaasarlunilu. Taamaammat sanaartornermi atornissaa 1970-ikkut naalersulli inerteqqutaalerpoq.
