Inissiarsuarni najugaqartut akiliutaat INI-mit qaffanneqalerput
Inissiarsuarni iluarsaassinissaq annertungaatsiartumik kinguaattooruteqarfiusoq qaffaanermut tunngavilersuutigineqarpoq. Inissiarsuarni najugaqartut ineqarnermut akiliutaat marsip aallaqqaataa 2010 aallarnerfigalugu qaffatsinneqassapput, qaffaanerli qanoq annertutigissanersoq suli aalajangerneqanngilaq.
Ineqarnermut akiliutit sapinngisamik appasinnerpaatinniarlugit najugaqarfiit ataatsimut kattunnissaat, Naalakkersuisut aamma aalajangerpaat. Ineqarnermut naalakkersuisup Jens B. Frederiksenip oqarnera malillugu ersarinnerusunik assigiinnerusunik paasiuminarnerusunillu tunngavissaqarnissaq siunertaavoq.
Najugaqarfinni ingerlalluannginnerusuni, qaffasissunik ineqarnermut akiliuteqartitsivioreersuni ineqarnermut akiliutinik annertuumik qaffaanernik eqqorneqarnissaat naapertuutissanngitsoq Naalakkersuisut isumaqarput.