Birte Nielsen inissiani kommunimit namminersortunut attartorneqarsimasuni najugaqarpoq.Assi: Kathrine Kruse // KNR

Inissianut atatillugu suliaq: Attartortup pisinnaatitaaffini ujariatsigigai

Birte Nielsen, Kommuneqarfik Sermersuup inissiani attartortittagaani akerleriissutaaqisuni attartortoq, pisortat aqqutigalugit attartortutut pisinnaatitaaffimi ilarpaaluinik ujariatsigisaqarpoq.

- Maalaarfissaqannginnerput isumaqarpunga pissusissamisuunngitsoq, Birte Nielsen aallarniuteqarpoq.

Birte Nielsen inissiani namminersortunit sanatinneqarsimasuni, kingornalu Kommuneqarfik Sermersuumit attartorneqariarlutik, kommuunip inissiaatileqatigiiffia, Iserit A/S, aqqutigalugu inissarsiorlutik utaqqisunut attartortinneqaqqittuni, attartortut ilagaat.

Kisianni inissiami, namminersortumit sanatinneqarsimasumi aamma pigineqartumi, najugaqarami ineqarneq pillugu maalaaruteqartarfimmut maalaarsinnaatitaanngilaq.

- Soorunami attartortitsisumut maalaarsinnaavugut. Aamma maalaaraangatta ilaanni akissutisisarpugut, oqarpoq.  

Ineqarnermi pillugu maalaaruteqartarfimmit inissiani kommuninit imaluunniit Namminersorlutik Oqartussanit attartortinneqartunit maalaarutit kisimik suliarineqarsinnaapput.

AAMMA ATUARUK Inissianut atatillugu suliaq Kommuninut Nakkutilliisoqarfiup suliareqqissavaa

Taamaattumik Birte Nielsenip tupigusuutigivaa inissiani assortuussutaasuni, Kommuneqarfik Sermersuup namminersortunit attartugaani, attartortut allat 416-it peqatigalugit ineqarneq pillugu maalaaruteqartarfimmut anngussisinnaatitaannginnini.

- Kisianni attartortitsisuminngaanniit arlaatigut pineqarnermut maalaarutissaqaraanni allat pisortat inissiaataaniittut maalaarfissaqarput. Tassa ineqarnermut maalaartarfimmut maalaarsinnaatitaangamik. Kisianni uagut attartortuusugut namminersortuni attartortutut isigineqaratta maalaarfissaqanngilagut. Ineqarneq pillugu maalaartarfiup suliassaanut ilanngunneqarsimannginnatta, oqarpoq.

Ineqarneq pillugu maalaartarfik

Ineqarneq pillugu maalaarfimmit kommunit imaluunniit Namminersorlutik Oqartussat inissiat attartortittagaannut tunngasut aalajangerneqarsimasut suliarisarpai, soorlu makku:

  • Inigisamiit nuunnermi naatsorsuutit
  • Inigisamut akiliutit qaffannerini ilisimatitsineq
  • Inigisamik aserfallatsaaliuineq iluarsaassinerlu
  • Inissiaatileqatigiiffiup aalajangiussaa periutsimut illersorneqarsinnaanngitsumut

Tusarfik: www.sullissivik.gl

Ineqarnermut akiliutit qaffanneqalersut

Birte Nielsenimi ilimasaarneqareersimavoq ineqarnermut akiliutigisartagaa ukiumit nutaamit qaffaavigineqassasoq. Naak taanna inissiamut nutaarsuarmut ukioq manna februaarip aallaqqaataani isertersimagaluartoq.

- Aappaagumut ineqarnermut akiliutinik qaffaanissamut nassinneqaratta, aamma aappaagumut missingersuutinik takusaqarnikuunnginnatta, taakkua maqaasillugit Iserit A/S-imut saaffiginninnikuungaluarpunga. Kisianni akissuteqarnerminni taakkua eqqaanngilaat, oqaluttuarpoq.

Birte Nielsen, Namminersorlutik Oqartussat inissiaatileqatigiiffianni INI A/S-imi soraarninngornissani sioqqullugu sulivoq, kingullermik sullissinermut pisortatut atorfeqarluni, taassumalu oqarnera naapertorlugu pisortat inissiaataanni attartortut attartornermut akiliutit qaffaavigineqarniartillugit nalinginnaasumik aggersarneqartarput ilisimatinneqarlutik suna pissutigalugu qaffaasoqarniarnersoq.

AAMMA ATUARUK Kommunit Nakkutilliisoqarfiata Sermersooq inissianik attartortitseqqiisarunnaarallartikkaa

Kisianni Iserit A/S-imit taamaaliortoqarsimanngilaq, inissiaatileqatigiiffimmi qaffaanissamut allakkatigut ilimasaaruteqarniarluni aalajangersimavoq, imalu qaffaanermut tunngavilersuuteqarsimalluni:

'Ineqarnermut akiliutit naleqqussarneqarput, ingerlatsinermi aningaasartuutit qaffakkiartorneri pissutaallutik, pingaarnertut inissiamik piginnittumut akiliutit naleqqussarnerisigut'.

Taamaattumik Birte Nielsenip kissaatigisinnaangaluarpaa inissiaatileqatigiiffimmit Iserit A/S-imit aggersarneqarlutik erseqqinnerusumik nassuiaanneqarsinnaanissartik.

- Aamma uanga eqqumiigigakku illumut taama nutaajutigisumut ineqarnermut akiliutit qaffanneqarnialersut, oqarpoq.

- Tassami nassuiaammik arlaqarluta maqaasisaqassaagut. Sooruna Iserit A/S qaffaaniartoq? Illuatungaatigullu oqaluttoqarluni uagutsinnut attartortitsineq inatsisinik unioqqutitsinerusoq. Taanna toqqissisimanannginnami.

Inissianut atatillugu suliaq

 

Kommunip namminersortunit inissiarpaalunnik Nuummi attartorsimanera inatsisit malillugit ingerlanneqarsimanersoq suliami qitiuvoq.

 

Kommunit nakkutilliisoqarfiata kommunalbestyrelsit aqutsineq pillugu inatsit aamma pisortani ingerlatsinermi malittarisassat allat najoqqutaralugit ingerlatsinersut nakkutigisarpai.

 

Nakkutilliisoqarfiup kommunalbestyrelsip imaluunniit aningaasaqarnermut ataatsimiititaliap aalajangigaa atorunnaarsissinnaavaa, aalajangerneq inatsisinut atuuttunut naapertuutinngippat.

 

Kommuunit nakkutilliisoqarfiata suliamik misissuinermini aalajangigaq atuuttussaajunnaarallartissinnaavaa.

 

Kommunit Nakkutilliisoqarfiata Kommuneqarfik Sermersooq 2020-mi novembarimi inissianik namminersortunit attartukkaminik attartortitseqqiisarunnaarallarsikkallarpaa.

 

Tamatuma kingorna Namminersorlutik Oqartussat avataaneersumik suliamut misissuititsivoq. Misissuisut kikkuunersut KNR-imit paasineqanngillat.

 

Misissuisulli nalunaarusiartik Kommunit nakkutilliisoqarfiata allattoqarfianut tunniutereersimalerpaat.


Nakkutilliisoqarfiup siulittaasuata ilaasortat suliaq pillugu novembarip qulingiluaani ataatsimiinnissamut aggersarsimavai.

 

Tusarfik: Naalakkersuisut siulittaasoqarfiata inassuteqaataa, aqutsinermut inatsit, naalakkersuisut.gl, KNR.

Najugaqartut sinniiseqanngillat

Birte Nielsenimmi aamma naluaa inissiarsuarmi nammineq attartorfimmini, attartortullu allat, najugaqartut sinniisaannik pilersitsinissamut pisinnaatitaaffeqarnerlutik.

- Maqaasivara attartortut ataatsimoorfeqannginnerput. Pissutissaqaratta ataatsimoorfeqassalluta aamma ataatsimoorluni saaffiginninnermi nukittunarnerusami, Birte Nielsen, najugaqarfigisamini 100-t tungaanut  attartortoqarunarneranik ilimasuuteqartoq, taama oqarpoq.

Kommuneqarfik Sermersuup inissiaatini attartortittakkat Iserit A/S-imut aamma Siorarsiorfik - Nuuk City Development A/S-imut januaarip aallaqqataani 2018-imi tunniuppai.

AAMMA ATUARUK Ineqarnermut suliaq Nakkutilliisunut suliassanngortinneqarpasilersoq

Tamannarpiarlu pissutigalugu Iserit A/S-i aqqutigalugu attartortut namminersortunit attartortutut nalilerneqartut, Iserit A/S-ip nittartagaani tamanna atuarneqarsinnaavoq.

Taamaattumik kommunip inissiaataani najugaqartut oqartussaaqataanermut periarfissaqanngillat, taamaattorli: 

- Taamaakkaluartorli inissiami attartortut najugaqartunut sinniisussamik qinersisinnaapput (immaqa najugaqartut peqatigiiffiliorlutik)  (§ 27) suut apeqqutaasinnaasut tamaasa Iserit A/S aqqutigalugu ineqartuni  oqaloqatigiissinnaallutik inissiamut tunngasunik, soorlu aamma Iserit A/S inissiat nakkutigigaat Siorarsiorfik-Nuuk City Development A/S-mit pigineqartut. Taamaasilluni allaanerulaartumik ilusilimmik najugaqartut sunniuteqarsinnaanerat inissiani ataatsimoortitsinernik piusartoq ingerlaannassapput, Iserit A/S nittartakkamini taama allappoq.

Sanasoq apeqqutinik qimatsisoq

Inissiaq, Birte Nielsenip ukioq manna februaarip aallaqqaataani iserterfigisaa, nutaavoq. Kisianni inissiani nutaani nalaanneqarsinnaasartut allat assingalugit, amigaateqarluni kukkusumik suliaqarfigineqartarsimavoq, taakkualu Birte Nielsenip attartorfigisani aqqutigalugu iluarsitissimavai.

Tassunga atatillugu sanasoq Birte Nielsenimut igalaamik makittarissaajartorsimavoq. Kisianni sanasoq Birte Nielsenimut apeqqutinngortunik qimataqarluni anisimavoq.

- Soorlu eqqaareerpakka iserternermi inissiami amigaataasinnaasut, immaqa sanasumiit kukkunerit allallu, ilami peqartuartarpoq sanaaq qanorluunniit kusanartigigaluaraangat pitsaatigigaluaraangamiluunniit pinngitsoorani arlaatigut aaqqitassaqartarpoq, soorlu immaqa igalaat equngasut imaluunniit wc-imi kuuginnartoqarluni ajortoqartoq, imaluunniit arlaatigut takussaasoqartarpoq sanasup nammineq aaqqitassaanik, oqaluttuarpoq.

AAMMA ATUARUK Namminersorlutik Oqartussat Kommuneqarfik Sermersuullu inissianik attartortitseqqiisarneq saqitsaatigigaat

Sanasorli Birte Nielsenimut igalaamik makittarissaajartortoq oqaluttuarsimavoq inissiaqarfimmi allami, namminersortumit aamma sanatinneqarsimasumi, taamatullu Kommuneqarfik Sermersuumit innuttaasunut attartortinneqaqqissimasumi, sanaartortitsut amigaataasunut akisussaajunnaarsimasut, tamannalu isertertut amigaataasunik allattuisimannginnerannik pissuteqartoq. 

- Taamaattumik maani najugaqarfitsinni aamma taamaattoqarsimassappat amigaatit entreprenørip suliassaralui ineqarfiup akilersussavai, taannalu aningaasartuutit amerlinerinik, naggataatigullu inissianut akiliutip annertusineranik kinguneqassooq, oqarpoq nangillunilu:

- Aamma nalunngilara aserfallatsaaliinermut tunngasut illu nutaajugaangat annikitsuaraasartut. Illumi nutaarsuummat. Kisianni eqqorsorinagu imaaliortoqarsimassappat: sanasup akiligassai inissiaqarfimmut akiligassanngorlugit nakkartinneqarsimassappata.

Ineqarnermut akiliutisi aappaagumiit qaffanneqartussanngoreermata taamaattoqarsinnaanera ernumagivat?

- Paaserusuppara. Missingersuutinik takusassaqartuugaluarutta immaqa paasisaqarnerusimassangaluarpugut. Aamma nalunngilarput najugaqarfik pinngitsoorani ingerlatsinermut aningaasartuuteqartartoq. Soorlu aputaajaanernut allanullu. Imaluunniit torsuusani asaatitsinernut. Tamakku qanoruna annertutigisumik missingersuusiorneqarsimasut?, Birte Nielsen aperivoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl