Inissianik piginnittunngortarneq

Inissianik piginneqatigiinnut nutaanik malittarisassaqalissaaq. Manna tikillugu pineqartut pillugit inatsiseqanngikkaluarpoq, maannali Naalakkersuisut nutaamik inatsisiliorniarput Nunatsinni piginneqatigillutik inissiaatilinnut piumasaqaatitalimmik.

Naalakkersuisunut ilaasortaq Kim Kielsen saqqummiussisoralugu Naalakkersuisut ullumikkut peqqussutissatut siunnersuuteqarput, tassani pineqarlutik piginneqatigiillutik inissiaatileqatigiinnut malittarisassatut aalajangersakkat. Ilaatigut pineqarlutik ataatsimut aningaasartuutit, sillimmasiinerit, aqutsineq aamma naatsorsuutit. Manna tikillugu piginneqatigiillutik peqatigiiffiit malittarisassaat naleqqussarneqaannartaraluarput.

Maannali tamanna allanngortinniarneqarpoq.

- Peqqussutissatut siunnersuut nutaajuvoq. Siusinnerusukkut pisortanit inatsisitigut naleqqussaasoqarsimanngilaq, tassa inissianik piginnittuusarneq ukiuni kingullerni aatsaat atorneqalermat. Inissianik piginnittut amerliartuinnarput taamaattumik inatsisitigut naleqqussaanissaq pisariaqartinneqarpoq, Ineqarnermut Attaveqarnermullu naalakkersuisoq Kim Kielsen oqarpoq.

Siunnersuut Inatsisartuni naalakkersuisoqatigiinnit illuatungiliuttunillu tapersersorneqarluarpoq. Ilaatigut Godmand Rasmussenip Atassummeersup maluginiarpaa “inissianik piginnittut siunissami pisinnaatitaaffitik pisussaaffitillu nalornisigiunnaassagaat”.