Inissianik attartortut artukkerneqartutut misigisimapput

- Suna tunngaviunersoq ersarissumik ilisimatitsissutigineqanngilaq. Allattoqarfia immikkut oqaluppoq, politikerillu immikkut oqalullutik, ulluilu imminut naalleraallutik. Taamaammat eqqumiitsupilussuuvoq, aalajangerneq tuaviupilunnertut allaat nalilerneqarsinnaalluni, Nikolaj Ludvigsen Nanortalimmiit oqarpoq.

Taanna Kommune Kujallermi Teknikkeqarnermut Ineqarnermullu ingerlatsivimmit inissiap attartorneranut akiliutip qaffanneqarnissaa pillugu septembarip 27-ani allagarsivoq, ineqarnermulli akiliutit ukiortaamiit qaffanneqarnissaat Kommune Kujallermi kommunalbestyrelsip septembarip 28-ani aatsaat aalajangerpaa, teknikkeqarnermullu ingerlatsiviup sioqqullugu allagaqaateqarnera Nikolaj Ludvigsenip pissusissamisoorsorinngilaa:

- Pissusissamisoortutut isiginngilara, imaassinnaasormi kommunalbestyrelsi allattoqarfiup inassuteqarnera akerleralugu aalajangertoq. Taamaattumik allattoqarfik uagutsinnut kalerriinermini tassani kukkusimavoq, Nikolaj Ludvigsen oqarpoq.

Ineqarnermullu akit qaffanneqarniarnerat atuisumut artukkiissaqisoq inimik attartortup Qaqortormiup oqaatigaa.

Kirsten Simonsen, pingasunik meeralik, kisermaatullu inuusoq inigisaminut qaammammut 5000-it koruuninik akiliisarpoq.
Maannalu inigisaminut qaammammut akiliutigisartagaa, januaarip aallaqqaataaniit 500 koruuninik qaffassaaq. Ilinniarsimasuulluni, meeqqanullu pingasunut pilersuisuulluni, aningaasat 500 koruunit inuuniarnermut artornareersumut, artukkeeqqissasoq oqaatigaa:

- Eqqarsarnaqaaq. Inuuniarnera ilungersuutigereerlugu qaammammut suli aamma qaffaqqippat suli ilungersornerulissaanga. Meeqqammi pissaqartinniarnerat ullutsinni imaannaanngitsigisoq, Qaqortormiu Kirsten Simonsen oqarpoq.

Ineqarnermut akiliutinik qaffaaniarneq eqqarsaatigeqqinneqartariaqartoq, Nikolaj Ludvigsenip oqaatigaa:

- Tassanngaannaq aalajangiisoqarpoq, inuppassuarnillu eqquissalluni, aamma inuit suliffissaaleqisut amerlapput. Taamaammat neriuppunga eqqarsaatigeqqissaartariaqaraat aningaasartuutinik saniatigut nassataqartussaammat, Nikolaj Ludvigsen oqarpoq.