Inissianik attartortumiit piginnittuulernissaq
Ualeq manna Inatsisartuni ilaasortat inissianik attartortuunermit piginnittuunermut ikaarsaarnissaq pillugu siunnersuutip oqallisiginerani oqaaseqarusuttorujussuupput, tassani siunnersuutigineqarpoq inigisap attartukkap Namminersornerullutik Oqartussanit imaluunniit kommunimit pisiarineqarsinnaalernissaa.
Naak Jørgen Wæver Johansenip, Siumumeersup, arlaleriarluni erseqqissaraluaraa namminersulernissamik anguniagaqarnermi sapinngisamik kalaallit amerlasuut inissiani attartukkaminni piginnittuulernissaat pingaaruteqartoq, ilaatigut Demokraatit siunnersuut isumaqatiginngilaat. Palle Christiansenip Demokraatineersup oqaatigaa inissiat tamarmik akissavimmissut akilerlugit tuninagit kammalaatinut akikinaarlugit tunineqartartut.
- Tassami Namminersornerullutik Oqartussat, Aningaasaqarnermut Ataatsimiititaliap piumasaa malinnagu inuiaqatigiit pigisaat nalillit tuniniarmatigik. Matumanimi akit suliffeqarfittut Arctic Green Food-itut amigartoorutissanngorlugit akilersinneqartarmata. Maannangaaq illut niuernermi akit malinnagit Namminersornerullutik Oqartussanit tuniniarneqarput, iluaqutaanngitsumillu peqqussusiorfiginiarneqarlutik, Palle Christiansen oqarpoq.
Aammattaaq Olga P. Berthelsen, IA, oqaluttarfimmit oqaaseqarusuttorujussuuvoq. IA-p siunnersuut tapersoraluarpaa, taamaattorli erseqqissarlugu inissiani tunineqartussani nutarterinissamut akisussaaffiup isummerfigineqartariaqarnera. Olga P. Berthelsenip inissiat qanoq issusaannik nalunaarusiortoqartarnissaa aammattaaq isumaqataaffigaa.
