Inissat ilinniarfiillu ineriartortinneqarnissaat naggueqatitta pingaartippaat

Inuit Tapiriit Kanatami, præsidentiata, Mary Simonip ministeriunermik, Stephen Harperimik ataatsimeeqateqarnermini naggueqatitta Inuit ineqarnerup ilinniartitaanerullu pitsanngorsarnerqarnissaannik kissaatigisaat ministeriunermut apuuppai.
januaarip 19-at 2009 14:07

Nunavummi naalakkersuisut siulittaasuat, Eva Aariak, Inuit Tapiriit Kanatamilu siulittaasoq, Mary Simon, Akilinermilu naalagaaffiup immikkoortortanni assigiinngitsuni naalakkersuisut siulittaasui ilagalugit Ministeriunermik ataatsimeeqateqarput. Ataatsimiinneq Akilinermi ukiumi 2009-mi aningaasartuutissat pillugit sapaatip akunnerata tulliani isumaqatigiinnialernissaq sioqqullugu isumasioqatigiinneruvoq.

Akilinermi aningaasat kaaviijaartinneqartut ilorraap tungaanut aallaqqinnissaat sunniuteqarfiginiarlugu, ministeriuneq aningaasaliissuteqassamaarami, naalagaffiup immikkoortortaani naalakkersuisut siulittaasui, soorunalumi naggueqatigiit Inuit Eqqillillu sinniisui tusarniaaffigai.

Mary Simon oqarpoq, ministeriunermut saqquummiinermini kissaatigisat piaartumik aaqqiiffigineqartariaqartut marluk saqqummiussimallugit. Siullertut ineqarniarnerup pitsanngorsaaffigineqarnissaa, aappaatullu ilinniartitaaneq, tassani meeqqat atuarfii ilisimatusarfinnilu ilinniartitaanerit eqqarsaatigalugit, ilinniartitaanerilli aamma ataatsimut isigalugit kiisalu mekanikerit, sanaartorerup iluani suliallit peqqissaanermillu suliallit pikkorissarteqqittarnerannut atatillugu pitsanngorsaasariaqarneq, saqqummiussimallugit Mary Simon oqarpoq.

Ministeriunermik isumasioqateqarnermi aamma attaveqaqatigiinneq sammineqarmat, issittumi illoqarfinni nunaqarfinnilu attaveqaqatigiinnissamut periarfissat, tamakkununnga ilanngullugu tarnikkut nappaatilinnut napparsimmaveqalernissap pisariaqartinneqarnera saqqummiussimallugu, Mary Simon oqarpoq.

Nunavummi naalakkersuisut siulittaasuat, Eva Aariak saqqumiigami kissaatigisat pingaartinneqartut taakkorpiaat aamma saqqummiuppai.

Mary Simonilu oqarpoq saqqummiussatik tusaaniarneqarluarlutik ilassilluarneqartut. Isumasioqatigiinnerup kingorna aamma aningaasaqarnermut inatsisissami, januaarip 27-aniit isumaqatigiinniutigineqalersussami, naggueqatigiit Inuit kissaatigisaat naapertorlugit aningaasartassaasa matussuserneqarsinnaalernissaat neriuutigalugu Mary Simon oqarpoq.