Inissaqartuugunik nunaqarfinnut nuussagaluarput
Naatsorsueqqissaartarfiup kisitsisaataasa takutippaat nunaqarfiit pineqartut innuttai ukiuni qulini 125-inik ikileriarsimasut.
Kapisillit eqqugaanerpaapput innuttaasut 68-iinnanngorsimagamik, Qeqertarsuatsiaanilu ukiut marluk kingulliit innuttaasut 25-inik ikileriarsimapput, maanna 248-nngorsimallutik.
Kapisilinni nunaqarfimmik aqutsisuni ilaasortaq Kaaleeraq Ringsted aperaarput, nunaqarfiat inuerutilernersoq.
- Taama oqassalluni immaqa siusippallaarpoq, massakkut inuusuttut kingumut amerliartoqqqilernikuupput siornatigut utoqqasaajunerusut maani amerlanerugaluaramik, Kaaleeraq Ringsted oqarpoq.
Aperaarput ineriartoqqissagunik suna pisariaqartinneraat.
- Siullermik pisariaqartitat annerpaartarivaat suliffissaqarnissaq nunami, nunaqarfimmiut maani nammineerlutik suliffissarisinnaasaat.
Suliffiit aalaakkaasut pilersinneqarnerisa saniatigut aalisagaqarlualeqqinnera malunnarmat aalisakkanik tunitsiveqaqqilernissaq angorusunneqarpoq. Aalisakkeriviummi siornaakkunni matunera innuttaasut suliffissaqarfiusunut nuunnerannut pissutaavoq. Kapisillit ineriartoqqinnissaminut aamma pisariaqartippai inissat.
-Illut nutaanngilisut piiarneqareernerisigut illunik nutaanik suli sanasoqaqqinnginnami, taamalilluni nuukkumasuugaluit aammalu maanngaanniit aallarnikut uterusuttuugaluit illussaqartitaannginnertik pillugu kingumut maanga suli uteqqinngillat.
Kaaleeraq Ringsteditulli Qeqertarsuatsiaani nunaqarfinni aqutsisut isumaqarput. Nuup Kommuneata illunik sanaartortitsinnginnera nunaqarfiit ineriartortinnissaannut aporfiunerpaavoq. Andreas Nathanielsen, Qeqertarsuatsiaanit ima oqarpoq:
- Inissaqartitsiniarnikkut kipiluttunarsiornerput annertuumik ajornartorsiutigivarput. Massakkut 21-it maani utaqqisut allattorsimaffianniipput. Taakkunani ilaqutariit ilaatigut ilaqarput nuliariit pingasunik meerallit inissaaleqillutik utaqqisut, maani. Ilaatigullu inimik angilaartunnguamik pissaqartitsinnginnerput tunngavigalugu illoqarfimminnut uteqqikkusuinnarlersunik. Tassa tamakkua ajornartorsiutigivagut.
Andreas Nathanielsen aamma oqarpoq, 1900-qarallarmalli illunik kingullermik sanasoqarnikuusoq, kisianni ataasiinnarmik sinittarfilinnguugamik ilaqutariinnut meeraqqortulaartunut tulluutinngivissunik.
- Tassa tamakku 1990-ikkut kingorna sananeqartarsimasut kingorna taamanili sanasoqaqqinngialq. Ajornartorsiutigivarput taanna assorsuaq. Uagutsinnut nunaqarfimmi aqutsisunut nuanniitsuuvoq apuussiniaraluarluta kommunalbestyrelsemut tusaaneqanngitsutut innerput taanna nuannaarutissartaqanngilaq.
Kapisillit Qeqertarsuatsiaallu nunaqarfimmi aqutsisui qanittukkut ataatsimiikkamik illussaaleqisitsineq anigorniaqqullugu Nuup Kommuneanut allagaqarput.
Nuuk kommuneata Kapisilinnut maanna atuarfeerussimassup innutaanut, Nuummut nuunniartunut neqeroorutigisarpaa initaartitsinissaq. Utaqqisut allattorsimaffianni Kapisilimmiut ilaqutariit ataatsit maanna utaqqipput.
