Nuummi atorfinittut inissaannik tunisisarnermi inatsit 2003-mi sukaterneqangaatsiarnerata kingunerisaannik utaqqisarneq sivikinnerungaatsialerpoq.
Nuummi INI-p immikkoortortaqarfiani pisortaq Anne-Sofie Thomsen oqarpoq, utaqqisarneq ukiuni kingullerni marlussunni sivikilleriangaatsiarsimasoq. Atorfinittut inissiassaannut allatsissimasut 2003-imi aasakkut 300-t missaanniipput, marsimilu ukioq manna utaqqisut 80-iinnanngorsimallutik.
Taamatuttaaq ininut pingasunik sisamanilluunnit sinittarfilinnut utaqqisut affaannanngorsimapput, ilaqutariit meerartaqqortuut ukiup ataatsip ingerlanerinnaani initaarsinnaanngorsimallutik, siornatigut ukiut pingajuat avillugu utaqqisarsinnaasimagaluarlutik. Inatsisinilli sukaterinerit aamma kingunipiloqarput, soorlu inuit illoqarfiup suatungaani initaarnissaminnut toqqaasinnaajunnaarsimammata, inissiamilu najugaqartussat amerlassusiat sinnernagit sinittarfilimmik taamaallaat tunisisoqarsinnaalersimalluni. Inatsisinik sukaterinermut pissutaatinneqarpoq, Namminersornerullutik Oqartussat utaqqiisaasumik inissiisarnerannut aningaasartuutigisartagaasa ikilisinneqarnissaat.
- Inatsisit allanngortinneqanngikkallarmata ukiumut 25 million koruunit sinnerlugit aningaasartuuteqartoqartarsimavoq. Inatsisit allanngortinneqarnerisigut aningaasartuutit 20 %-imik apparput, appaqqinnissaallu naatsorsuutigaarput. Ineqarnermut Pisortaqarfimmi immikkoortortami pisortaq Olafur P. Nielsen oqarpoq.
