Inissaaleqineq naallersimaarinnippoq
Ilulissani ineriartorfiungaatsiartumi sanasussanik, suliffissuaqarnermilu sulisussanik amigaateqarnermi, inissaaleqineq annertuumik naallersimaarinnippoq.
Sanaartortitsiviit ilaat 24-nik atorfiuteqartut sanasutut ilinniarsimasunik arfineq-marlunnik taamaallaat sulisoqartariaqartarput, naak minnerpaamik aqqaneq marluusussaagaluarlutik.
Taamaattumik sanasut ilinniarsimasut illuliamiit illuliamut arpaqattangaatsiartariaqartartut, sanaartornerillu kinguaattoortartut Ilulissani sanaartortitsivimmik LEG-BYG-imik piginnittoq Lars Erik Gabrielsen Oqarpoq.
Silamik pissuteqarluni kinguaattoortarnerit saniatigut, ukiukkut umiarsuit tikissaaraangata sanatitsisut atortussatigut kissaatigisaannik pilersuiniarneq aamma kinguaattoortitsisarmat sukkasuumik sanaartorniarneq ajornarsisartoq Lars Erik Gabrielsen oqarpoq.
Ilulissani INI A/S-p immikkoortortaqarfiani pisortaq Claus Jacobsen oqarpoq, maannakkumut nalinginnaasumik inissarsiorlutik allatsissimasut 300-sut suliffimminnullu atatillugu inissarsiortut 30-it missaanniittut, taakkununngalu illoqarfiup avataaniit qinnuteqartut aamma ilaasut.