Inip silaannarissuunissaa ataatsimiinnermi sammineqarpoq

Issittumi najugaqarluni najukkat silaannarissuunissaasa qanoq pingaaruteqartiginerat Sisimiuni ataatsimeersuarnermi sammisat ilagaat, tamannalu Kinamit peqataasunit pissarsissutaassagunavippoq.
marsip 17-at 2009 12:04

Issittumi nunallit illui oqortuullutillu inuuffigiuminassagunik qanoq sananeqassappat, sunik atortoqassappat pitsaasuujuassappatalu qanoq paarineqassappat. Apeqqutit taakku allarpassuillu Cold Climate HVAD 2009-mik taallugu Sisimiuni ataatsimeersuarnermi akissutissarsiniarneqarput.

- Inuup najukkamini ajunnginnerpaamik atugassaqarnissaa anguniarneqarpoq, soorluttaaq nunarsuup sinneranut sunniutai isiginiarneqassasut. Ineqarneq eqqarsaatigalugu inummut peqqinnarnerpaaq avatangiisinullu mingutsitsinnginnerpaaq anguniartariaqarpoq. Apeqqut taanna uani ataatsimeersuarnermi sammisat pingaarnersaasa ilagaat, ataqatigiissaarisoq Bent Michael Nielsen oqarpoq.

Sanaartornermi illup iluata qanoq oqorsarneqartarnissaa silaannarissarneqartarnissaalu oqaluuserisanut ilaapput.

Sanaartornermik siunnersuisartoqatigiit Rambølli Kalaallit Nunaanni ukiuni 30-ni kingullerni illulioriaatsimik misilittagaqarput. Ataatsimeersuarnermi Cold Climatimi oqariartuutigaat inissiap iluata silaannarissuunissaata pingaassusia.

- Nunami issittumi najugaqarluta inuiassuarnut allanut naleqqiulluta ikittunnguuvugut. Taamaakkaluartut tamatta immikkut iliuuseqarsinnaavugut. Inigisatta silaannarissuutinnissaa pingaartorujussuuvoq. Peqqissuutissavaatigut, sulerusussuseqalersissalluta, iluarusutsissalluta ilaqutariittullu attaveqatigiinnitsinnut iluaqusiisinnaalluni, Jørgen Hansen oqarpoq.

- Nerisassanik igasarneq Kalaallit Nunaanni atorneqartorujussuuvoq, ilisimavarpullu igagaangatta aalaq qanoq atsigisoq aniatittartigineripput. Taamaammat silaannarissarfeqarnissaq pingaarluinnartuuvoq, aalarmi aniaffissaqanngitsoq illup iluani oqummik pilersitsisarpoq. Oqullu ilisimaneqarpoq napparsimanersitsisartutut, Jørgen Hansen erseqqissaavoq.

Sila pillugu ataatsimeersuarneq Sisimiuni Taseralimmi ingerlanneqartoq, ukiut pingasukkaarlugit pisarpoq. Ilisimatusartut, illussanik titartaasartut, ingeniørit, sanaartortitsisut allallu sanaartornermik suliaqartut 100-t nunarsuarmit tamarmeersut peqataapput.