Ininik attartornermi peqqussut nutaaq
Inimik attartornermik peqqussutip nutaap atuutilerneratigut aappariit ineqatigiilerniarnerminni periarfissaat pitsaanngorsarneqalerput.
Taama oqarpoq Ineqarnermut pisortaqarfimmi pisortaq Olafur P. Nielsen.
Inuit marluk aappariilernermik kingorna ineqatigiinniarlutik aalajangernerminni inimik ataatsimik sinneqartoortarput. Tusartakkagullu malillugit ini sinneruttoq unioqqutitsilluni attartortinneqartarpoq, tamanna unitsinniarlugu inatsisini periarfissarsiuunnialerparput init taamatut sinneruttuukkat ukiumi ataatsimi attartortissinnaanngortillugit.
Taamaalilluni inuup nammineq inigisani ukiumi ataatsimi attartortissinnaalerpaa. Attartortitsinerli qaammatinit pingasunit sivikinnerussanngilaq.
Siusinnerusumut naleqqiullugu attartortitsiniarnermi peqquteqartariaqanngilaq.
Peqqussummi nutaami aamma inigisamik paarlaasseqatigiinnissaq ajornannginnerulissaaq.
Peqqussut nutaaq atuutilersussaq malillugu sivikinnerpaamik ukiuni pingasuni inigisami ineqareeraanni allamilu ineqartup inaanik paarlaasserusulluni isumaqatigiinnerup kingorna paarlaattoqarsinnaalissaaq.
Peqqussut juulip ulluisa aallaqqaataanni atuutilissaaq.
Ineqartut naammagittaalliorfissaannik aamma pilersitsisoqarniarpoq.
