Inissiani pisoqaanerusuni asbesteqarnersoq misissuiffigineqassaaq. Ineqarnermut Attaveqarnermullu pisortaqarfiup illuinnaat sanaartukkallu allat 1976 sioqqullugu sananeqarsimasut misissuiffiginiarpai, Namminersornerullutik Oqartussat nittartagaanni nanoq.gl-imi taama allaaserinnittoqarpoq.
Misissuinissami siunertarineqarpoq sanaartornermi atortussat asbestitallit qanoq atsigisumik atugaasimanerat paaserusunneqarmat. Nunatsinni sanaartornermi 1976-ip missaata tungaanut asbestip atorneqartarsimanera ilisimaneqarpoq 1987-imilu asbestip sanaartornermi atorneqarnissaa inerteqqutigineqalerpoq.
Namminersornerullutik Oqartussat aamma kommunit inissiaataanni attartortut inigisamik asbesteqarnera paaserusukkunikku, attartortitsisunut soorlu Inissiaatileqatigiiffimmut INI-mut tamanna paasiniarsinnaavaat.