Inigisaq ajornartorsiutaammat nunaminut utiinnarniarpoq

- Kalaallit Nunaanniinnitsinni inigisartaatsinni ajornartorsiuteqangaaratta utiinnarniarluta aalajangerpugut, taama Danmarkimit tikisitaalluni qammatit arfineq marluk matuma siorna atorfinittoq, Thomas Maschoreck ilaquttanilu toqqissisimanartinngisaminnik initaartinneqarsimasoq oqarpoq. Taassuma sulinermut atatillugu inissamik utaqqisut ikilisimanerata illuatungaa misillerfigisimanerarpaa:

- Siorna tikeqqaarninniit utaqqiisaangallartumik inissianut arlaqartunut nooqattaartinneqaqqaarpunga, ilaquttakka tikimmata allamut inissinneqarpugut, oqarsinnaavungalu taamanili erngullutik nipiliortunik eqqissiviilliortitaanerput aallartittoq, Thomas Maschoreck oqaluttuarpoq. Inigisaringallagartik toqqissisimananngimmat namminersorlutik ininik attartortitsisartuni nassaarlutik inissilluaruttortut nalunaarfigineqarput, initaartut naaggaassagunillu allamik periarfissaqanngitsut. Ilaqutariit initaaminnut isumalluarlutik nutsersimapput, kinguninnguali paasisimallugu najuligartik aamma toqqissisimananngilluinnartoq.

- Nuukkatta aqaguani eqqaamiugut ullaamut nipiliorput erngullutik. Sapaatillu akunnerisa naaneri tulliit eqqaamiutta paarlakaallutik sinitsinngitsoorteqattaartarpaatigut, allaat politiilersuussisariaqartarsimalluta. Nuunnitsinniilli eqqaamiugut akissarsiffinni taamaattuarput, INI-mullu naammagittaallioratta oqarfigineqarpugut atsiornernik katersissasugut, uagutsinnulli tamanna ajornarpoq eqqaamiugut tamarmik ernngullutillu nipiliortartuummata, Thomas Maschoreck oqarpoq.

Oqarpoq ungasinngitsukkut unnuaq ullorlu ilivitsoq eqqaamiutik nipiliormata Danmarkimut utiinnarnissallutik aalajangersimallutik.

Thomas Maschoreck isumaqarpoq initaarnermi qinigassinneqartannginneq inissinneqarnikkut iluanaanngitsoortunut ajornartorsiortitsilersartoq.

- Paasilluarsinnaavara inissaaleqinermut anertuumut taama aaqqiisoqartariaqarsimasoq, kisianni allatut aaqqiinissamut aamma periarfissaqaraluarpoq soorlu utaqqiisaangallartumik inigisalinnut akiliuteqartitsisarnikkut, kiisalu qinigassiisarnikkut. Iluatsitsinngikkaannili atorfimmut atusumik inigisap ajornartorsiutinngorsinnaanera qularutissanngilaq. Initaareerluni eqqisiviilliortitaanerup inimik allamik nassaarniarnissaq neriunartuerutsittarpaa, aammalu nutseqqinnermi aningaasartuutit nammineq akilertariaqarput, Thomas Maschoreck oqarpoq.

Thomas Maschoreck aamma oqarpoq Danmarkimi peqatigiilluni illutaarniartunut utaqqisuni normu annaanngikkaluarlugu neqeroorfigitinnermi naaggaarsinnaatitaaneq maani atorluarsinnaangaluartoq, taamaalilluni qinigassiinikkut initaarnermi ajornartorsiutit annikillisarneqarsinnaammata.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat