Inigisanut akit qaffattut
Taava kommunip iniutaaniittut agguaqatigiissitsinikkut 590 koruuniniit kvadratmeterimut 607 koruuninut januaarip aallaqqaataani akiliinerusalissapput Qasigiannguarmiut qaffasinnerpaamik, tamaanimiut 755 koruuninik akiliinerusalisammata.
Ini A/S –mi aningaasaqarnermi pisortaq Charlotte Wordenskjold Nørregård oqarpoq, aasap ukiallu ingerlanerini ininik piginnittut, tassa Namminersornerullutik Oqartussat kommunillu naapeqatigisaritsik missingersuusioqatigiittaramik.
-Attartortut qaammammut akiliutissaat aaliangerniarneqaraangata tunngavigineqartarput missingersuusiat ukiumilu atuuttumi immikkoortortaqarfiit isertitaasa aningasartaat apeqqutaallutik qanoq amerlatigisunik isertitaqarsimaneri.
Aamma aliangiisooqataasarput ukiumi tulliuttumi missingersuutit, taama nassuiaavoq Charlotte Wordenskjold Nørregård.
Erseqqissaavoq ukiumi iserttat tassaasartut attartortut qammamut akiliutaat, erniat kiisalu ukiumi missingersuusiorfimmi Inip immikkoortortaqarfiisa missingersuutaasa inerneri.
-Tunngavigisarpavut Ini a/s-ip inissianik immikkoortortai. Taakkununnga qaammammut akiliutit ukiup ataatsip ingerlanerani katinneqarlutik kisinneqartarput, taakkuuppullu immikkoortortaqarfiup isertittagai.
Soorunami aningaasartuutit isertitallu oqimaaqatigiittussaapput.
Assersuutigalugu Ini a/s–ip immikkoortortaqarfiani ataatsimi inissiat 136–upput katillutik 1000 m2-usut. Taakkua 136–t ukiup ataatsip ingerlanerani isertitaasa inernerat kvadratmeterimut agguarneqassaaq inernerallu inissiap ataatsip kvadratmeterimut angissusaanut amerlisarneqassaaq, nanineqassaarlu qammammut inissiamut ataatsimut akiliutissaq, taama nassuiaavoq Charlotte Wordenskjold Nørregård.
Aamma oqarpoq immikkoortortaqarfiit angisuut amerlasuunik inissiartallit qaammammut akiliutikinnerusartut, attartortut amerlanerullutik kvadratmeterimut akiliuteqartarnissaq nammattarmassuk.
Ini-p iniutaanut akiliutit agguaqatigiissitsinikkut 1.755 koruuninik amerlassuseqalerput. Kisianni Nanortalimmiut qaffaaffigineqarnerpaajugamik 7,1 %-imik taakku ukiumut agguaqatigiissillugit 2.579 koruuninik naleqarput.
