Inigisamut akiitsut 55,7 mio. kr.

Qaammatit tamaasa INI A/S nunatsinni attartortunut 1550-it missaaniittunut allakkanik akileeqqusissutinik nassiussisarpoq, najugaqartut akiligassallit kinguaatoorsimagaangata. Taakualu attartortunit 11.200-juusnit 14. procentiupput. Amerlaqisut isumaqarput attartortut INI-mut akiitsorpassuaqartut, taamaasimanngilarli.

INI A/S-mi Inissianik attartornermi pisortaq Mogens Hansen oqarpoq, attartortut akiliineq ajortut INI-mut akiitsoqalerneq ajortut, akiitsoqarfigineqalertartullu tassaasut attartortut akiliinissamik isumaginnilluartuusut.

-Tamanna aamma ima isumaqarpoq najugaqartut tamarmik piffissaq eqqorlugu akiliisartuugaluarpata ineqarnermut akiliutit appasinnerusinnaagaluartut, Mogens Hansen oqarpoq. Oqaatigisinnaanginnerarpaalu qanoq akiliinikinnerusoqarsinnaagaluarnersoq.

Ilanngullugu oqaatigineqarpoq najugaqartut peqatigiiffiisa ajornartorsiutaattut tamanna taaneqarsinnaasoq, najugaqartut akiliutaasa procentialunnik appartinneqarsinnaagaluarnerat taamaalilluni pinngitsoortinneqarmat.

Ukioq kingulleq tamaat isigalugu inigisamut akiligassallit katillugit 55,7 millioni koruuninik akiitsoqalersimapput, ilaat nuusimasut ilaallu anisitaasimasut. Ajornartorsiullu isiginnaaginnarneqanngilaq.

-Inissianik attartornermi inatsisit Namminersornerullutik oqartussanit allanngortinniarneqartoq, INI A/S-imiillu paasititsiniaaneq najugaqartut piffissaq eqqorlugu akiliisarnissaanik oqariartuuteqartoq suliarineqassasoq Mogens Hansen oqarpoq.

Aamma akiliussisartoq PBS aqqutigalugu najugaqartut akiliinerusalissasut kaammattuutigineqarpoq, tamannami taamaallaat najugaqartut 30-niit 35 procentit missaasa kisimik atugarigaat oqaatigineqarluni.

Allakkerivitsigut inigisamut akiliisarneq piffissaajannartuusoq INI A/S-mi Inissianik attartornermi pisortaq Mogens Hansen aamma oqarpoq.

Ukiut tamaasa najugaqartunut akiliinissamut kinguaatoorsimasunut agguaqatigiisillugu 15000 –eriarluni INI A/S nassiussisartoq aamma oqaatigineqarpoq. Inissiallu 11200-it missaat INI A/S-imiit illuutigineqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat