Inigisamit anisitaasut Olga P. Berthelsenip inatsisitigut illersorneqarnissaat qulakkeerusuppaa
Olga P. Poulsen susassaqarfiup malittarisassiuunneqarnissaa kissaatigaa, taamaaliornikkut innaallagissamik, imermik kiassarnermillu pissarsisinnaasoqarnissaa qulakkeerniarlugu. Ilaqutariit meerartallit minnerpaamik, meeqqaminnut iggassisinnaanissaminnut periarfissaqartariaqarput. Piumasaqaatit taakku ineqarnermut akilititigut kinguaattooqqanertik imaluunniit inissiami najugaqartunik allanik ajornartorsiuteqarnertik pissutigalugu anisitaasimasunut tamanut assigiimmik atuutissapput.
-Imaassinnaavoq tamanna atornerlunniarneqarsinnaasoq, ikitsuinnaalli taamaaliornissaat ilimagaara. Inuit ikiorusutakka tassaapput taakku isertitaqanngitsut, taamaattumillu ineqarnermut akiliutiminnut akissaqanngitsut. Inissikkallarneqarnissaat, innaallagissamillu, imermik kiassarnermillu pissarsisinnaanissaat qulakkeerneqartariaqarpoq. Allatut ilioraanni inuppalaanngippallaassaqaaq, tamannalu IA-p tungaanit allanngortikkusupparput, Olga Poulsen Berthelsen knr.gl-imut oqaluttuarpoq.
FN-ip aningaasaqarnikkut, isumaginninnikkut aammalu kulturikkut aalajangersagai naapertorlugit, innuttaasoq kinaagaluartoq pisinnaatitaaffeqarpoq naammaginartumik ineqartinneqarnissamik, taamatullu FN-p meeqqat pisinnaatitaaffiinik aalajangersagaani allaqqasoqarluni, meeqqat naammaginartumik peroriartornerminni atugassaqartinneqartassasut.
-Ilaqutariit angerlarsimaffeqannginnertik pissutigalugu meeqqaminnik isumaginnissinnaajunnaarpata, tamanna meeqqat pinngitsaaliissummik inissinneqarnerinik kinguneqarsinnaavoq, tamannalu sapinngisara tamaat pinngitsoortikkusuppara. Ilaqutariit meeqqatik iggassinnaasariaqarpaat, ineqarnermut akiliuteqarsinnaanerat akiliuteqarsinnaannginneralluunniit apeqqutaatinnagu. Sammisaq mannarpiaq pillugu nalunaaruteqarnikuuvugut, taannalu 2002-mi februaarip aallaqqaataani atorunnaarsinneqarpoq, ukiullu maanna aqqanillit qaangiunneranni susassaqarfimmut nutaamik nalunaarusiortoqarnissaa kissaatigisupilussuuarput. Ajornartorsiutip iluarsineqarnissaa pimooruttariaqalerparput, Olga P. Berthelsen isumaqarpoq.