Inigisamit anisitaalluni sakkortoqaaq
- Misigisaq sakkortoqaaq, ingammik aappannut siusinaarluni utoqqalinersiuteqartumut, tamanna toqqissisimananngilaq aamma kajuminnerput minnerulernikuuvoq, Tittus Karlsen Narsami najugalik oqarpoq.
Aappariit A/S Inimit anisitaasut aalajangersimasumik suliffeqanngillat aapparisaalu siusinaarlunilu utoqqalinersiuteqartuulluni.
Aappariit INI A/S-imut katillugit 100.000 koruunit missaannik akiligassinneqarput, taakkunannga 30.000 koruunit missaat anisitaanermut atatillugu akiligassaralugit. Tamanna aappariit paasiuminaatsippaat.
Tittus Karlsen oqaluttuarpoq kommunip innersuussaani utaqqiisaagallartumik inajugaqatigiiffimmi ineqarlutik. Kisianni atugassarititaasut oqitsuinnaanngitsut Tittus Karlsen oqarpoq:
- Inigisarput peqqinnanngilaq tassami suertaqaaq isugutaqalunilu. Kommunimit neriorsorneqarpugut upernarpallaannginnerani nutaamik innersuunneqassasugut, tamanna qilanaarivarput, tassami inimut kissalaartumut kuuginnartumillu imilimmut iserternissarput iluassaqimmat, Tiottus Karlsen oqarpoq.
Tittus Karlsenip aappaata Lea Ottosenip siusinaarluni utoqqalinersiutai atorlugit akiligassatik akilersorpaat. Tittus Karlsen aalisakkerivimmi piffissap ilaa sulisarpoq, kisianni qaqugu aalajangersimasumik atorfininnissani naluaa.
Tittus Karlsenip ilanngullugu oqaatigaa akiligassatik aggustimi 34.000 koruunit missiliulersimagaat.
A/S Inip qullersaqarfianit oqaatigineqarpoq, anisitsinermut atatillugu Nuummi poortuineq eqqiaanerlu 30.000 koruunit angullugit akeqarsinnaasartoq, Qaqortumili 6.000 koruunit missaannik akeqartarluni.
