A/S-ini siulersuisut isumasioqatigiisinneqarput

Suliffeqarfissuit siulersuisuini ilaasortat Naalakkersuisut qanoq imminerminnut utaqqiffiginninnerannik ilisimatinneqassapput aammalu siulersuisuni sulinissaminnut immersorneqassallutik.

Naalakkersuisut Siulittaasuat Kuupik Kleist ataatsimiinnermik ammaalluni oqalugiarpoq, oqalugiaammini suliffeqarfissuit akisussaassuseqartumik ingerlatsinissaannik kaammattuuteqarnini qitiutillugu. Taama Namminersornerullutik Oqartussanut tusagassiuutinut nalunaarumminni allapput.

- Suliffeqarfissuit piviusumik isigalugit kalaallinit inuiannit pigineqarput. Sinneqartooruteqarnissamik piumasaqarfigineqarnissi saniatigut inuiaqatigiit inooqataaffigisasi pitsaasumik sunniuteqarfigissallugit akisussaaffeqarpusi, qujarnartumimmi taamaaliortarnissinnik assersuutissarpassuaqarpoq, Kuupik Kleist ammaanermi ippassaq oqalugiarnermini ilaatigut taama oqarpoq.

Taassuma oqalugiarnermini oqariartuutigaa Kalaallit Nunaata aningaasaqarnermigut imminut nappassinnaalernissaata anguniarnerani suliffeqarfissuit Namminersorlutik Oqartussanit tamakkiisumik ilaannakortumilluunniit pigineqartut pisussaaffeqartut inuiaqatigiinni aningaasarsiornerup annertusarneqarnerani ingerlaavartumik ataavartumillu peqataassallutik.

- Nunarput aningaasassaaleqivoq aningaasarsiornikkullu siuariartorsinnaanissaq aajunaralaannguamiinngilaq, taamaattumik pisortat aningaasalersuisarnerat tunuarsimaartumik ingerlanneqartariaqarpoq pisortanillu aningaasaliissutigineqartartut kinguneqarluartarnissaannik qularnaarinninnissaq pisariaqarpoq, Kuupik Kleist oqarpoq suliffeqarfissuarnilu siulersuisuusunut iliuusissanik nutaanik tikkuussilluni.

Naalakkersuisut ilanngullugu kaammattuutigivaat Namminersorlutik Oqartussat pigisaanni suliffeqarfissuarni siulersuisuusut ukiumoortumik naliliiffigineqartarnissaat.

Ataatsimiititsinerup ulluisa aappaanni siulersuisutut suliassat itisilerlugit sammineqarput, qulequtanngorlugit naatsorsuutit itisilerlugit qanoq paasineqartarnissaannut, suliffeqarfiit sillimmaserneqartarnerinut aammalu soraarnerussutisiaqartarnermut tunngassuteqartut sammineqassallutik.

Ataatsimiititsineq ulluni 17. aamma 18. November 2010 Katuami Nuummi ingerlanneqarpoq.