INI pisuussuteqannginnerarpoq
INI-miit tusagassiuutinut nalunaarummi allapput, “Nukissiorfiup inissianik attartortunut ataasiakkaanut innaallagissamut akiligassanik qanoq nassiussuisarnera INI-miit ilisimasaqarfigineqanngitsoq”.
Taamatut nalunaaruteqarnerannut patsisaavoq, aviisimi Sermitsiami allaaserineqarmat, erngup aqqutaata qeritsaaliorneranut innaallagissamut atorneqartumut akiligassaq INI-mit attartortunut akilersinneqartarsimasoq. Attartortuunermut peqqussut naapertorlugu taamaaliortoqartussaanngikkaluarpoq.
INI tusagassiuutinut nalunaarummini allappoq, inissiaatileqatigiiffiup decembarimi siornali Nukissiorfiit nalunaarfigisimagai, illuni sorlerni – attartortut ataasiakkaat pinngikkaluarlugit - erngup aqqutaata qeritsaaliornera INI-mit qanoq akilerneqassanersoq. Taamaattumik INI isumaqarpoq pisussaaffini naammassisimallugu aamma “ 2008-mi januaarimili Nukissiorfiit tusagaqarfigeqqinnginnamikkik, ilimagigitsik paasissutissat pisariaqartinneqartut Nukissiorfimmit pissarsiarineqarsimassasut”.
Attartortut innaallagissamut akiligassaminnik nalornissuteqartut INI-p immikkoortortaanut saaffiginnissinnaapput, akiligassarlu Nukissiorfiit suleqatigalugit misissorneqassaaq.