Naalakkersuisut tusagassiuutitigut nalunaaruteqarnikuugaluartut najugaqartut A/S INI-mut saaffiginninnermikkut najugaqarfitsik asbest’eqarnersoq paasisinnaassagaat, INI massakkut ikiuutaavallaarsinnaanngilaq.
Pisortaa Kenneth Jørgensen ima oqarpoq:
- Ilimagivarput asbesteqartoqassasoq qanorli annertiginersoq ilisimanngilarput, taamaammat ineqartut paasiniaagaangata sumiiffinni ilisimasat apeqqutaallutik akissuteqartoqartassaaq asbest’eqartoqarnersoq, siunissamili nalunaarsorlugu ilisimalissavarput qanoq asbest’eqarfiginersoq, Kenneth Jørgensen KNR-imut oqarpoq nangillunilu: -A/S INIp najugaqarfiit ataavartumik nalunaarsortareerpaat, atortutigut oqarsaataatigullu
Massakkullu qanoq asbest’eqartiginersoq nalunaarsuinermut ilanngunneqassaaq, kisiannili inissiarpassuummata ornigunnigut iluatsillugit misissuisassaagut, Kenneth Jørgensen oqarpoq.
Misissuinitsinni titartakkat sanaartukkallu sannai misissuutigalugit asbest qanoq ittuunersoq nalunaarsorniartassavarput:
Asbest illersortilersornagu ersiinnartumiinnersoq ikeriniinnersoq tamakkualu assigisai pillugit nalunaarsuilluta ilisimasaqalissaagut, INI A/S-ip pisortaa oqarpoq nangillunilu:
Immikkoortortaqarfinni pisortat nalileeqataassapput asbest nassaassaasoq sukkanerpaamik iliuuseqarfigineqassanersoq. Aperigatsigulu asbest peqqinnissamut ilorianartumiissappat qanoq iliuuseqassanersut ima oqarpoq:
- Ulorianarpat uloriananngippalluunniit apeqqutaatinnagu nalunaarsussavarput, ukiumut sisamariarluta sanaartukkanut tunngasutigut nalunaarusiortarpugut piginnittunut, tassungalu iluatsillugu asbest’eqassusaa pillugu aamma piginnittunut nalunaaruteqassaagut.