A/S INI-p siunissaa assortuussutaavoq

Inissiaatileqatigiiffiup INI-p siunissaa kommunit akornanni isumaqatigiinngissutaavoq.

Kommunit isumaat saqqummerput Ineqarnermut Pisortaqarfiup kommuninut apeqquteqaataasigut, siorna novembarimi nassiussuunneqartutigut.

Isumasiuinermi paasiniarneqarpoq INI-p suliai assigiinngitsut kommunini qanoq isumaqarfigineqarnersut. Taamaalilluni pisortaqarfiup neriuutigaa kommunit INI pillugu isumaat tamatigoornerusoq saqqummersissinnaallugu.

Radioaviisip paasisai naapertorlugit INI-p sulineranik iluarinnittut tassaapput Maniitsup Sisimiullu kommunii, illuatungaani iluarinninngilluinnartut tassaallutik Illoqqortoormiut Ammassallillu kommunii. Taakku INI-p akisussaaffii tigorusuppaat.

Kommunit ilaasa INI-p suliaasa ilaannakorlugit tigorusuppaat.

Ineqarnermut Pisortaqarfiup paasiniaanerani kommunit arfineq-marluk suli akissuteqanngillat, pisortaqarfimmilu naatsorsuutigineqarpoq kommunit akissutaat tamakkeriarpata INI-p siunissaa qanoq ittuussanersoq nalunaannerulersimassasoq.