INI-p Securitassillu Nuummi suleqatigiinnerat ingerlaqqissaaq

Nuummi inissiani eqqissiviilliortoqartillugu nakkutilliineq Securitas-ip aamma A/S Inissiaatileqatigiiffik INI-p suleqatigiinnertik ukioq ataasinngorpaat. Suleqatigiinnermi naammagisimaarinneqaqaaq.

INI A/S pigaartullu Securitas siorna ininik nakkutilliisarnissamik isumaqatigiissuteqarput. Siunertaasimavoq inini attartukkani eqqissiviilliortitsisunik ingalassimatitsisiniarnissaq – immikkoortumilu pisortap Susie Kristiansenip iluatsilluartutut nalilerpaa.

-Aaqqissuussineq iluarisimaarnaqaaq. Attartortummi nipiliortunit, eqqissiviilliortunit sakkortusaarniartunillu ippinniortinneqartut aaqqissuussineq iluaqutigisimaqaat – nipiliortartullu ikileriarnerannut peqqutaaqataasimavoq – paasilersimavaammi taamatut iliuinnarunik iniminnit anisitaasussaallutik, – sulili taama pisoqarsimanngitsoq, Susie Kristiansen INI A/S-imeersoq oqaluttuarpoq.

Nakkutilliisuutitaneersup Securitasip pisortaata Lars Bruunip oqaluttuaraa qaammammut 60-t missiliorlugit eqqissiviilliortunut, nipiliortunulluunniit orniguttariaqartarlutik, maannali ornittakkatik ikiliartortut.

Saaffiginnittoqartillugu aggertarput nalunaarusiorlutillu allattuisarlutik. Matut silataanni naalaartarput takusassarsiortarlutillu.

Naammagittaalliortoqartillugu allattukkat uppernarsaatitut atorneqartarput……….

Erseqqissaatigineqarporli nakkutilliisuutitat Securitasimeersut politiitut pisinnaatitaaffeqannginneri.