INI A/S-p nammineerluni akisartua paasissaanngitsoq!

februaarip 02-at 2006 17:11

INI A/S-p kalaallinut saaffiginnittunut oqarasuaatikkut nammineerluni akisartua, kalaallit amerlanerit tamakkiisumik paasisinnaagunanngilaat.

(Nipi arnap qallunaap kalaallisut oqalunniarsarisup INI A/S-p ammasarneranik nassuiaalluni paasissaarpiarani oqalunnera minutsip missaani tusartinneqarpoq)

INI A/S-p nammineerluni akisartua pillugu oqaasileriffik aammalumi radio aviisi inunnit saaffigineqartarpoq, ilaatigut nammineerluni akisartoq asuleerutaasoralugu aperisarlutik. Tamanna pillugu, oqaasileriffimmi atorfilik akademisk fuldmægtigi Nuka Møller ima oqarpoq.

- Siullermik oqaatigisariaqarpoq, taanna qallunaaq nersortariaammat, kalaallisut taggerluppallaarani kalaallit oqaasiinik pingaartitsilluni ingerlatsisimammat, taannartaa nersortariaasoraara. Oqaasileriffimmi suleqatikkalu tamanna aamma eqqartorparput, tamannalu maluginiarparput. Taamaattoq isumaqarpugut, suleqataasut qulakkeertariaqaraluaraat, taamatut oqaluttup pitsaasumik oqalunnissaa qulakkeerneqartariaqaraluartoq, tassami pisortatigoortumik avammut saqqummerniaraanni torersuusariaqarmat qallunaatuujugaluaruni kalaallisuujugaluaruniluunniit pitsaassusia qulakkeersimassagaluarpaat, Nuka Møller oqarpoq.

Taanna aperaarput, tamanna kalaallit oqaasiinut innimiilliornerunnginnersoq.

- Isumaqanngilanga, inuttaa ajorissagipput, suliffeqarfilliuna oqarfigineqartariaqartoq immiunneqartup iluamik kalaalliusut oqalulluarsimanissaata qulakkeerluartariaqarnera, tamatsinnut tusarliunneqannginnerani, Nuka Møller oqarpoq.

Oqaasileriffimmiit Nuka Møller taama oqarpoq.

INI A/S-p ingerlatsinermut pisortaata Allan Werge-p tamanna kunngusuusaarnarnerarpaa.

- Ullaarli iluarsinialeraluarparput, nalunngikkaluarparput quujassuaatigineqarluta aalajangiinnarpugulli ammatiinnarniarlutigu, inuimmi sianersinnaasariaqarmata, Allan Werge oqarpoq.

Taanna neriorsuivoq aqagumiit kalaallimik kalaallisuik oqaluttumik immiussisitsissallutik