A/S INI-p inigisamut akiliutit akikillissavai
Inissiaatileqatigiiffiup A/S INI-p inissiaataanni najugallit ineqarnermut akiliumminnik ukioq manna apparsaavigineqarnissartik qilanaarisinnaavaat. Inissiaatileqatigiiffiup INI-p ullumi ataatsimeersuarnerani tamanna erserpoq, 2008-mi sinneqartoorutit 6,2 millioni koruunit suliffeqarfissuup tassani saqqummiummagit.
maajip 28-at 2009 17:25
Sinneqartoorutit 2007-imut naleqqiullugit pingajorarterutingajaapput, Inissiaatileqatigiiffimmilu pisortap, Kenneth Jørgensenip, akikillisaasinnaanertik nuannaarutigaa.
- Inissiat immikkoortortaqarfianniit aningaasat taama ingerlalluarsinnaasimagatsigik nuannaarutigalugulu tulluusimaarutigeqaarput, sinneqartoorutigummi tamangajaasa attartortunut taamaalilluta neqeroorutigisinnaalerpavut, tassa inigisaminnut akiliutaannik apparsaavigisinnaanngoratsigik, A/S INI-mi pisortaq, Kenneth Jørgensen, Radioaviisimut oqarpoq.
A/S INI-p malunnartumik sinneqartoornera pissutigalugu ineqarnermut akiliutit 336 koruuninik ukioq manna appariassapput.
