INI A/S nakkaattooriaannaasoq

Inissiaataatileqatigiit INI A/S-ip aarleqqutigaa suliaq Atertamik taaguutilik Danmarkimi eqqartuussiviit qullersaannit, Højesteretimit, suliarineqanngippat nakkaattooriaannaanini. Tamanna saqqummerpoq INI A/S-ip ullumi Nuummi ataatsimeersuarnerani.

Eqqartuussiviup Østre Landsretip Nuummi Atertami ineqartut akiliivallaarsimaneq tunngavilersuutigalugu suliassiissutaat aalajangiiffigimmagu suliassiisut ajugaapput. Tamatuma kinguneranik INI A/S-ip ineqartut akiliuteqarpallaarsimasut utertitsiffigisariaqalerpai. Taamatulli aalajangerneq INI A/S-ip Højesteretimut suliareqqitassanngortippaa.

- Højesteretimi suliaq ingerlaqqinngitsoorpat Østre Landsretip aalajangersaanera atortussanngortitaassaaq. Taamaalilluni aalajangersakkap timitalernissaa INI A/S-ip pisussaaffigilersussaavaa, INI A/S-imi siulersuisunut siulittaasoq Inge Bisgaard oqarpoq.

Ataatsimeersuarnermi saqqummerpoq inissiaatileqatigiit aktiaataat 32 mio kruuninik naleqartut namminerlu aningaasaatit 42 mio kruunit missinginiillutik. Utertoorutissanuinnaq aningaasartuutissat 100 mio kruunit sinneqarnissaat naatsorsuutigineqarpoq.

Inge Bisgaard oqarpoq ajornartorsiutaasoq inissiani allani najugaqartut suliassanngortitsisinnaanerat tamanna INI A/S-imik artukkiisussaammat.