INI-mi pitsanngorsaaqqittoqarniartoq

Inissiaatileqatigiiffiup INI A/S-ip sulisuni sisamararterummik ukiuni kingullerni pingasuni ikilivai. Suliffeqarfillu 2015-imi 5,8 millionit koruuninik sinneqartooraluartoq ukiunilu aggersuni pitsanngorsaaginnarniartoq, siulersuisuni siulittaasoq, Jette Larsen oqarpoq.

Allattoq Ivik Kristiansen, Thomas Munk Veirum

maajip 26-at 2016 14:20

- Allat, soorlu namminersortut, allaffissornikkut neqerooruteqassappata, aamma inissiat pisortanit pigineqartut eqqarsaatigalugit, uagullu arlaatigut unammillissagaluarutta, piareersimajuartuarnissarput siunertarivarput, INI-p siulersuini siulittaasoq, Jette Larsen oqarpoq.

Taanna nassuiaavoq, INI-mi sulisut sisamarterutimik ukiut pingasut ingerlanerini ikilisimasut. Allaffissornikkullu pitsanngorsaanerit INI-llu suliassaata ilaata Namminersorlutik Oqartussanut suliffeqarfinnullu allanut tunniunneqarsimaneri sulisut ikilinerannut pissutaapput.

Aamma atuaruk INI A/S sinneqartooruteqartoq

Sulisunillu ikilisaasariaqarsimaneq eqqarsaatigalugu INI A/S-ip 2015-imut 5,8 millionit koruuninik sinneqartoorsimanera naammaginartuusoq, tamatumunngalu pitsanngorsaanerit patsisaaqataasut, siulersuisuni siulittaasup oqaatigaa.

Sulili allaffissornikkut pitsanngorsaasoqarniarpoq. Tamannalu INI-p attartortuinut 9000-inut kiffartuussilluarnermik sunniuteqassasoq, Jette Larsen oqarpoq, ilanngullugulu oqarluni pitsanngorsaaqqinnissani soraarsitsinerit siunertaanngitsut.

- Suliat, ullumikkut suliarisagut suliariinnassagutsigit, tassa takorluunngilara ikileqqinnissaat. Taanna siunertaanngilaq, INI A/S-ip siulersuisuini siulittaasoq, Jette Larsen oqarpoq.